सकाळी अकरानंतर उघड्या असलेल्या किराणा दुकानांवर पोलिस, तसेच महापालिकेकडून कारवाईचा बडगा उगारण्यात येत आहे. परंतु, याचा अतिरेक होत असून, पाच हजार रुपयांचा दंड वसूल करून पाचशेची पावती हाती टेकवल्याचा प्रकार पेठरोड परिसरात घडला.
ही बाब निदर्शनास आणून देताच संबंधितांनी पावतीवर दुरुस्ती करून दिली. महापालिकेने अशा अनधिकृत वसुलीवर नियंत्रण आणावे, अशी मागणी व्यापाऱ्यांकडून होत आहे. पेठरोड परिसरातील किराणा व्यापारी प्रकाश पटेल यांनी सांगितले, की दोन दिवसांपूर्वी आमच्याकडे एका दुकानामध्ये धान्याची पोती खाली होत होती. तेथे महापालिकेचे दहा-बारा कर्मचारी आले आणि त्यांनी दुकाने बंद करण्यास सांगितली. फक्त तीनच पोती राहिली आहेत, तेवढी दुकानात ठेवून लगेच बंद करतो, अशी विनंती त्यांना केली. मात्र, कर्मचाऱ्यांनी तत्काळ दुकान बंद करण्यास सांगितले. येथे शेजारीच असलेल्या श्री विनायक ट्रेडिंग, ओम प्रकाश जनरल स्टोअर आणि प्रकाश एंटरप्राइज ही दुकाने सुरू असल्याने त्यांच्यावर दंडात्मक कारवाई करण्यास सुरुवात केली. यावेळी काही कर्मचाऱ्यांनी तिन्ही दुकानांकडून प्रत्येकी एक हजार रुपयांची पावती फाडण्यास सांगितले. पाच हजार रोख घेऊन एकच पावती देण्यात आली. परंतु, ती पाचशे रुपयांची होती. याबाबत त्यांना विचारले असता त्यांनी या पावतीवर एक शून्य वाढवून पाच हजार रुपये करून दिले. तीन व्यापाऱ्यांचा दंड एकाकडून घेऊन त्यांना एकच पावती कशी दिली जाते, असा सवाल उपस्थित करतानाच दंडाची नेमकी रक्कम किती, चुकीच्या पावत्या देऊन वरच्या पैशांचे काय होते आदी सवालही पटेल यांनी उपस्थित केले आहेत. याबाबत पटेल यांनी महापालिका आयुक्त कैलास जाधव यांच्याकडे ई-मेलद्वारे तक्रार केली असून, नगरसेवकांनाही सोशल मीडियाद्वारे या प्रकरणाची माहिती दिली आहे.
अनेक व्यापाऱ्यांना फटका
कारवाईबाबत विशिष्ट समाजालाच टार्गेट केले जात असल्याचा आरोपही व्यापाऱ्यांकडून होत आहे. द्वारका, काठे गल्ली, महात्मानगर या परिसरातील गुजराती पटेल समाजाच्या मोठ्या व्यापाऱ्यांकडून अशा मोठ्या रकमेच्या पावत्या फाडण्यात आल्याचे व्यापारी सांगतात. आतापर्यंत शेकडो व्यापाऱ्यांना दंडाचा फटका बसला आहे.
करोनाला रोखण्याऐवजी पैसे गोळा करणे हेच या पथकांचे मुख्य उद्दिष्ट झाले आहे. पाच मिनिटे उशीर झाला, तरी दुकानांत घुसून पावत्या फाडतात. अनेक व्यापाऱ्यांना असा त्रास दिला जात आहे.