प्रेमविवाह केल्यानंतर काही दिवसांमध्येच पतीला दारूचे व्यसन लागले. घराकडे पती लक्ष देत नसल्यामुळे पत्नी कसाबसा संसाराचा गाडा चालवत होती. पत्नीने घरभाड्यासह वीजबिलाचे पैसे साठवून ठेवले. मात्र, पतीने हे पैसे घेऊन दारू प्यायली. त्यामुळे पत्नीला संताप आल्यामुळे तिने अंगावर रॉकेल ओतून पेटवून घेऊन आत्महत्या केल्याची धक्कादायक घटना उंड्रीतील कमल अपार्टमेंटमध्ये घडली.
या प्रकरणी कोंढवा पोलिस ठाण्यात गुन्हा दाखल करण्यात आला आहे. अंकिता कुंदन कांबळे (वय २५, रा. उंड्री ) असे आत्महत्या केलेल्या महिलेचे नाव आहे. याबाबत अंकिताचे वडील व्यंकट जाधव (वय ५२) यांनी तक्रार दिली आहे. या प्रकरणी पती कुंदन कांबळे (वय २९, रा. उंड्री ) याच्या विरुद्ध कोंढवा पोलिस ठाण्यात गुन्हा दाखल करण्यात आला आहे. कुंदनला दारूचे व्यसन होते. त्यामुळे अंकिता आणि कुंदनमध्ये आर्थिक कारणांवरून वाद होत होते. घरभाडे आणि वीजबिलाचे पैसे भरण्यासाठी अंकिता पैसे साठवून कुंदनपासून दूर ठेवत होती. मात्र, १२ एप्रिलला कुंदनने अंकिताने घरभाड्यासह वीजबिलासाठी ठेवलेले पैसे गुपचूप घेतले आणि त्या पैशांची दारू पिऊन तो घरी आला. त्याचा राग आल्यामुळे अंकिता आणि कुंदन यांच्यात वादावादी झाली. त्यामुळे राग सहन न झाल्यामुळे अंकिताने १२ एप्रिलला स्वतःच्या अंगावर रॉकेल ओतून घेत पेटवून घेतले.
त्यानंतर तिला उपचारासाठी ससून रूग्णालयात दाखल करण्यात आले. उपचारादरम्यान २४ एप्रिलला रात्री साडेबाराच्या सुमारास मृत्यू झाल्याचे डॉक्टरांनी घोषित केले. पत्नीला आत्महत्येस प्रवृत्त केल्याप्रकरणी कुंदनविरोधात गुन्हा दाखल करण्यात आला आहे, अशी माहिती सहायक पोलिस निरीक्षक संदीप मधाळे यांनी दिली. .