अहमदाबाद जिल्ह्यातील कालुपूर रेल्वे स्टेशन येथे २००६मध्ये झालेल्या बॉम्बस्फोट प्रकरणी पुणे पोलिसांच्या मदतीने गुजरात दहशतवाद विरोधी पथकाने (एटीएस) मोहसीन पूनावाला याला वानवडी परिसरातून मंगळवारी अटक केली. सुमारे १५ वर्षांनंतर मोहसीनला अटक करण्यात ‘एटीएस’ला यश आले आहे. गुजरात एटीएसचे पथक मोहसीनला घेऊन गुजरातला रवाना झाले आहे.
गुजरात एटीएस १४ वर्षांपासून फरारी असलेल्या अब्दुल रजाक गाजीला ऑगस्ट २०२०मध्ये बांगलादेशाच्या सीमेवरून अटक केली होती. त्या वेळी मोहसीनची माहिती समोर आली होती. तेव्हापासून गुजरात एटीएसचे पथक मोहसीनच्या मागावर होते. तो पुण्यातील वानवडी परिसरात वास्तव्यास असल्याची माहिती मिळाल्यानंतर त्यांनी पुणे पोलिसांच्या मदतीने वानवडीतून मोहसीनला अटक केली. फेब्रुवारी २००६मध्ये कालुपूर रेल्वे स्टेशनच्या प्लॅटफॉर्म क्रमांक दोन आणि तीनच्या मध्यभागी बॉम्ब ठेवल्याचा आरोप त्याच्यावर आहे. या स्फोटात अनेक लोक जखमी झाले होते. मात्र, सुदैवाने कोणाचा मृत्यू झाला नव्हता.
स्थानिक पोलिसांच्या मदतीने अटक
गुजरात एटीएसने बॉम्बस्फोट प्रकरणातील पुण्यात वास्तव्यास असलेल्या एका संशयित आरोपीला ताब्यात घेण्यासाठी स्थानिक पोलिसांची मदत मागितली होती. त्यानुसार त्यांना या कारवाईसाठी मदत देण्यात आली असून, त्यांनी मोहसीन पूनावालाला अटक केली असल्याची माहिती पोलिस उपायुक्त नम्रता पाटील यांनी दिली आहे.