नालासोपारा पश्चिमेकडील हनुमान नगर भागात दोन तरुणांनी एका महिलेला नोकरी लावण्याच्या बहाण्याने तिच्यावर सामूहिक बलात्कार केला आहे. पीडित महिलेच्या तक्रारीवरून नालासोपारा पोलिस ठाण्यात गुन्हा दाखल करण्यात आला आहे. या गुन्ह्यातील दोन्ही तरुणांना अटक करण्यात आली.
नालासोपारा पूर्व येथे राहणारी एक ३७ वर्षीय महिला विरार पश्चिमेच्या ग्लोबल सिटी भागात स्वयंपाककाम काम करायची. त्याचवेळी डिलिव्हरी करणाऱ्या एका तरुणाबरोबर तिची ओळख झाली. या तरुणाने त्या महिलेला एका चांगल्या जागी नोकरी लावतो, असे आमिष दाखवले. फेब्रुवारी २०२०मध्ये त्याने तिला नालासोपारा येथील एका इमारतीच्या फ्लॅटवर आणले. तिथे आधीच एक तरुण होता. या दोघांनीही तिला धमकावून तिच्यावर बलात्कार केल्याचे महिलेने पोलिसांना दिलेल्या माहितीमध्ये सांगितले.