करोनाच्या पार्श्वभूमीवर आवश्यक ती खबरदारी घेत १ ते १० मार्च या काळात राज्याचे अर्थसंकल्पीय अधिवेशन पार पडणार आहे. पहिल्या आठवड्यात पाच, तर दुसऱ्या आठवड्यात तीन दिवस कामकाज होणार आहे. १ मार्चला राज्यपालांच्या अभिभाषणाने अधिवेशनाची सुरुवात होईल, तर ८ मार्चला २०२१-२२ या वर्षासाठीचा अर्थसंकल्प मांडला जाईल. गुरुवारी कामकाज सल्लागार समितीच्या बैठकीत याबाबतचा निर्णय घेण्यात आला.
विधानसभा आणि विधान परिषद कामकाज सल्लागार समितीची बैठक विधिमंडळाच्या प्रांगणात पार पडली. यावेळी विधान परिषदेचे सभापती रामराजे नाईक-निंबाळकर, उपसभापती डॉ. नीलम गोऱ्हे, उपाध्यक्ष नरहरी झिरवाळ, मुख्यमंत्री उद्धव ठाकरे, उपमुख्यमंत्री अजित पवार, विधान परिषदेचे विरोधी पक्षनेते प्रवीण दरेकर, विधानसभेचे विरोधी पक्षनेते देवेंद्र फडणवीस, महसूलमंत्री बाळासाहेब थोरात, संसदीय कार्य विभागाचे सचिव राजेंद्र भागवत आदी उपस्थित होते.
– अधिकारी, कर्मचारी, सुरक्षा कर्मचारी व मान्यवरांना आरटीपीसीआर चाचणी सक्तीची
– विधान भवन परिसरात ‘निगेटिव्ह प्रेशर सिस्टम’ कार्यान्वित करणार
– मंत्री व राज्यमंत्री यांच्यासोबत एकाच अधिकाऱ्याला प्रवेश
– अधिवेशन कालावधीत खासगी व्यक्तींना विधानभवनात प्रवेशबंदी