राम मंदिराच्या उभारणीसाठी निधी गोळा करण्याचे अभियान सुरू झाल्यानंतर भाजपचे नेते, माजी खासदार रामशेठ ठाकूर यांनी या कार्यासाठी १ कोटी रुपयांची देणगी दिली आहे. पनवेल शहर संघचालक प्रशांत कोळी यांच्याकडे ठाकूर यांनी १ कोटी रुपयांचा धनादेश सुपुर्द केला.
राम मंदिर निर्माण संपर्क अभियानाच्या पनवेल येथील कार्यालयाचे उद्घाटन मकर संक्रातीच्या दिवशी करण्यात आले. लो. टिळक पथावरील गंगा कावेरी इमारतीत हे कार्यालय सुरू करण्यात आले आहे. पनवेलमधील ज्येष्ठ डॉक्टर ययाती गांधी यांच्या हस्ते या कार्यालयाचे उद्घाटन झाले. या कार्यक्रमात ठाकूर यांनी हा मदतीचा धनादेश दिला. यावेळी भाजपचे उत्तर रायगड जिल्हाध्यक्ष आमदार प्रशांत ठाकूर, कोकण म्हाडाचे माजी सभापती बाळासाहेब पाटील, संघाचे प्रांत सहकार्यवाह शरद ओगले, शिरीष देशमुख, पनवेल शहर संघचालक प्रशांत कोळी, अभियानप्रमुख राजीव बोरा, अभियान सहप्रमुख गौरव जोशी, महिला संपर्क प्रमुख स्वाती कोळी यांच्यासह कार्यकर्ते उपस्थित होते. अयोध्येत बांधण्यात येणाऱ्या राम मंदिराच्या कामास सुरूवात झाली आहे. सर्वांच्या योगदानासाठी राष्ट्रीय स्वयंसेवक संघाच्या संस्था, संघटनांनी देशव्यापी संपर्क व निधी संकलन अभियान सुरू केले आहे.