कलम ३७० संबंधीच्या निर्णयानंतर निर्माण झालेल्या तणावाच्या पार्श्वभूमीवर मुंबईसह पश्चिम किनारपट्टीवर हाय अॅलर्ट आहे. नौदल व तटरक्षक दलाच्या युद्धनौकांनी किनारपट्टीलगत मोठ्या प्रमाणावर गस्त सुरू केली आहे. तर खोल समुद्रात नौदल विमानांच्या देखरेखीसाठी घिरट्या सुरू आहेत. याच सर्व पार्श्वभूमीवर नौदल प्रमुखांनीही मंगळवारी मुंबईला तातडीची भेट दिली.
काश्मीर मुद्यावरून सध्या भारत-पाकिस्तान यांच्यातील संबंध बिघडले आहेत. लष्करीदृष्ट्या तणावाची स्थिती निर्माण झाली आहे. त्याचवेळी समुद्रातून २६/११ सारखा हल्ला होऊ शकतो, अशी गुप्त माहिती नौदलाला मिळाली आहे. यामुळे संरक्षण मंत्रालयाने संपूर्ण पश्चिम समुद्र व किनारपट्टीला ‘हाय अॅलर्ट’वर राहण्याची सूचना दिली आहे. याअंतर्गत किनारपट्टी सुरक्षेला प्राधान्य दिले जात आहे. स्वत: नौदल प्रमुख अॅडमिरल करमबीर सिंह यांनी त्याचा मंगळवारी तातडीच्या दौऱ्यात आढावा घेतला.
संरक्षण जनसंपर्क अधिकारी कमांडर मेहुल कर्णिक यांनी सांगितले की, ‘नौदल प्रमुखांनी या भेटीदरम्यान कमांडअंतर्गत असलेल्या पश्चिम समुद्री क्षेत्रातील नौदलाच्या सज्जतेची माहिती घेतली. गुजरातमधील पोरबंदर ते कर्नाटकमधील कारवारपर्यंत नौदलाची नेमकी तयारी काय आहे, याचे सादरीकरण अधिकाऱ्यांनी त्यांच्यासमोर केले. पदभार स्वीकारल्यानंतर ही त्यांची पहिलीच भेट होती. बुधवारी सकाळी ते रवाना झाले.’
एकीकडे नौदल प्रमुखांनी पश्चिम कमांड मुख्यालयाला भेट दिली असतानाच दुसरीकडे मंगळवारीच संरक्षण मंत्री राजनाथ सिंह यांनीही गुरूग्राम येथील नौदलाच्या एकात्मिक माहिती व्यवस्थापन व विश्लेषण केंद्राला (आयमॅक) भेट दिली. त्यात त्यांनी समुद्री सुरक्षेची ‘रिअल टाइम’स्थिती जाणून घेतली. एकूणच सद्य तणाव स्थितीमुळे अरबी समुद्रातील सुरक्षा, हा विषय केंद्र सरकारने प्राधान्यावर घेतल्याचे दिसून येत आहे.
किनारपट्टी व समुद्री सुरक्षेची सज्जता अशी
– १२ सागरी मैलापर्यंत युद्धनौकांची गस्त अधिक चोख
– नौदल व तटरक्षक दलाच्या बहुतांश नौका पूर्णवेळ समुद्रात
– छोट्या नौका किनारपट्टी भागात व मोठ्या नौका खोल समुद्रात
– १२ सागरी मैलाच्या पलिकडील समुद्रावर हवाई गस्त
– नौदल विमानांच्या देखरेखीसाठी घिरट्या
– पोरबंदर येथील वैमानिकविरहित (यूएव्ही) व गोव्यातील पी८आय आणि डॉर्निअर विमानांचा समावेश