अकरा वर्षांच्या मुलाच्या धाडसामुळे एका सराईत चोराला पकडल्याची घटना विरार येथे घडली. आईचे सोन्याचे दागिने पळवून नेत असताना चोरट्याशी दोन हात करत त्याने हे दागिने मिळवण्यासाठी चोराचा प्रतिकार केला.
विरारच्या पश्चिमेकडील एम. बी. इस्टेट परिसरात न्यू तपोवन इमारतीत प्रकाश महाडिक त्यांच्या पत्नी दिव्या आणि मुलगा तनिष यांच्यासोबत राहतात. मंगळवारी सकाळी ११ वाजण्याच्या सुमारास दिव्या महाडिक या आपल्या मुलीला शाळेत सोडण्यासाठी गेल्या होत्या. त्याच दरम्यान तनिष हा घरी एकटाच असताना एक ५० ते ५५ वर्षांच्या व्यक्तीने दुरुस्तीचे कारण देऊन घरात शिरण्याचा प्रयत्न केला. घरात कुणी नाही तुम्ही नंतर या, असे तनिष ने सांगितल्यानंतर चोराने जबरदस्तीने सर्वेक्षणाचे कारण देत घरात शिरकाव केला. घरात एकटा मुलगा असल्याचे पाहून या चोरट्याने त्यांच्या कपाटातून दागिने काढले. त्याच्या हातात आईचा सोन्याचा हार पाहून तनिषने धाडस दाखवून चोराचा प्रतिकार केला. त्याच्या हातातील हार हिसकावून आरडाओरडा सुरू केला. तेवढ्यात दिव्या महाडिक घरी पोहोचल्या. त्यांनीही त्याला पकडण्याचा प्रयत्न केला; मात्र त्यांनादेखील दोन मजले फरफटत आणून चोरट्याने तेथून पळ काढला. यावेळी आरडाओरडा केल्यानंतर सोसायटीमधील नागरिक एकत्र आले आणि त्यांनी चोराला पकडले. नागरिकांनी त्याचे हात बांधून ठेवले आणि नंतर विरार पोलिसांच्या ताब्यात दिले.
विरार पोलिसांनी आरोपीला अटक करून न्यायालयात हजर केले. वसई सत्र न्यायालयाने या चोरट्याला सोमवारपर्यंत पोलिस कोठडी सुनावली. या चोरावर नालासोपारा आणि विरार येथे या आधी चोरी केल्याचे गुन्हे नोंद असल्याचे विरार पोलिसांनी सांगितले.