बारावीच्या विद्यार्थिनीची घरी जाऊन फिजिक्स विषयाची शिकवणी घेणाऱ्या इंजिनीअर शिक्षकाने तिच्याशी जवळीक साधून लग्नाची मागणी घातली. विद्यार्थिनीने पालकांना हा प्रकार सांगितल्यावर शिकवणी बंद केली. मात्र, शिक्षकाकडून वारंवार फोन करून मुलीला त्रास देण्याचा प्रकार सुरू झाला. तसेच तिच्या मोबाइलवर अश्लील संदेश पाठविण्यास सुरुवात केली. त्यामुळे त्रासलेल्या मुलीने पालकांच्या मदतीने विश्रांतवाडी पोलिस ठाण्यात तक्रार दाखल केली. यावरून पोलिसांनी शिक्षकावर गुन्हा दाखल केला असून, मोबाइल लोकेशनवरून आरोपीला धानोरी जकात नाका येथून अटक केली.
संदीप कुमार (वय ३५, रा. पोरवाल रस्ता, लोहगाव, मूळ रा. बिहार) असे अटक केलेल्या आरोपीचे नाव आहे. त्याचावर विनयभंग आणि आयटी कायद्यानुसार गुन्हा दाखल करण्यात आला आहे. या प्रकरणी वीस वर्षीय मुलीने फिर्याद दिली आहे.
पोलिसांनी दिलेल्या माहितीनुसार, ‘धानोरी परिसरात राहणारी विद्यार्थिनी पुण्यातील एका नामांकित महाविद्यालयात ‘बीसीए’ चे शिक्षण घेत आहे. दोन वर्षांपूर्वी मुलगी बारावीला असताना फिजिक्स विषयासाठी खासगी शिकवणीसाठी शिक्षक शोधत होती. ‘जस्ट डाइल’वरून चौकशी केल्यावर आरोपी संदीप कुमारचा नंबर तिला मिळाला होता.
शिक्षकाशी संपर्क साधल्यावर त्याने घरी येऊन शिकवणी घेण्याची तयारी दर्शवली. दररोज सायंकाळी आरोपी घरी येऊन मुलीची शिकवणी देत होता. कालांतराने दोघांची चांगली ओळख झाल्यावर मुलीशी जवळील साधून एकेदिवशी त्याने लग्नाची मागणी घातली. पण मुलीने लग्नाला नकार देत पालकांना ही गोष्ट सांगितल्यावर शिकवणी बंद केली. त्यानंतर आरोपी मुलीच्या मोबाइलवर वारंवार संपर्क साधून मैत्री ठेवण्याचा आग्रह करू लागला. त्या वेळी पोलिसांत तक्रार दिली असता पोलिसांनी आरोपीला बोलावून समज दिली. यामुळे त्याने काही दिवस मेसेज पाठविणे बंद केले. पण पुन्हा आरोपीने एका पान टपरीचालकाच्या मोबाइलवरून मुलीला अश्लील मेसेज पाठविण्यास सुरुवात केली. त्यामुळे त्रासलेल्या मुलीने आईच्या मदतीने पोलिसांत तक्रार दाखल केली.
पोलिसांनी मोबाइल क्रमांकाच्या आधारे टपरीचालकाला ताब्यात घेतल्यावर आरोपीचा खरा नंबर मिळाला. त्यावरून पोलिसांनी सोमवारी सकाळी त्याला पोरवाल रस्ता येथून ताब्यात घेत अटक केली.
– रवींद्र कदम, पोलिस निरीक्षक (गुन्हे)