केंद्रीय लोकसेवा आयोगाकडून (यूपीएससी) घेण्यात आलेल्या केंद्रीय सशस्त्र पोलिस दल परीक्षेत मालेगावातील सूरज सुभाष पवार याने ३५२ वा क्रमांक मिळविला आहे. त्याची असिस्टंट कमांडटपदी निवड झाली आहे. निवृत्त सैनिक सुभाष पवार यांचा तो मुलगा आहे. देशसेवेचे बाळकडू मिळालेला सूरज दृशनिश्चयी असून अभ्यासाचे नियोजन आणि कठोर परिश्रम या बळावर त्याने यश संपादन केले आहे.
‘यूपीएससी’द्वारे घेण्यात येणाऱ्या नागरी सेवांकडेच बहुतांशी तरुणांचा कल असतो. सूरजने मात्र वेगळी वाट निवडली. सूरजचे वडील निवृत्त सैनिक तर आई गृहिणी आहे. शालेय शिक्षण भारत विद्यालय, केबीएच विद्यालय तर महाविद्यालयीन शिक्षण मसगा महाविद्यालयातून पूर्ण झाल्यावर सूरजने स्पर्धा परीक्षांवर लक्ष केंद्रीत केले. सन २०१४ पासून अभ्यास करीत असताना तीन वेळा अपयश आले. परंतु, देखील तो खचला नाही. सुरुवातीला नागरी सेवेकडे त्याचा कल होता; मात्र केंद्रीय सशस्त्र पोलिस दल परीक्षेची माहिती मिळाल्यावर त्याने ठरवून आपला ट्रॅक बदलला. पूर्वपरीक्षा, शारीरिक चाचणी व मुलाखत असे तीन टप्पे पार करीत त्याने हे यश संपादन केले. या परीक्षेत देशभरातून प्रविष्ठ झालेल्या तब्बल तीन लाखपैकी केवळ ४१६ जणांची निवड झाली आहे.
महाविद्यालयात असल्यापासूनच आव्हानात्मक करायला मिळेल अशाच क्षेत्रात जायचे निश्चित केले होते. इंग्रजीवर प्रभुत्व मिळविले. दृशनिश्चय केला तर यश नक्कीच मिळते. देशाच्या आंतरिक सुरक्षेची संधी मिळाल्याने मोठा आनंद आहे. अभ्यासात मित्रांची खूप मदत झाली.
– सूरज पवार,
असिस्टंट कमांडट