घर लुटण्यासाठी आलेल्या सशस्त्र गुंडांना पिटाळून लावणाऱ्या वृद्ध दाम्पत्याचा तामिळनाडू सरकारने मुख्यमंत्री शौर्य पुरस्काराने सन्मान केला आहे. सेन्थमराई आणि पी. शणमुगवेल या दोघांनीही चोरांना पिटाळून लावतानाचा व्हिडिओ सोशल मीडियावर काही दिवसांपूर्वी व्हायरल झाला होता.
११ ऑगस्टच्या रात्री घराच्या अंगणात बसलेल्या शणमुगवेल यांच्यावर सशस्त्र गुंडाने हल्ला केला होता. त्यांच्या गळ्याभोवती टॉवेल गुंडाळून त्यांना बांधून ठेवायचा प्रयत्न केला. त्याचवेळी शणमुगवेल यांना वाचवायला त्यांची पत्नी सेन्थमराई घरातून बाहेर आली आणि तिने गुंडाला चप्पल फेकून मारली. चप्पल लागल्यामुळे त्याचा तोल गेला आणि शणमुगवेल यांनी स्वत:ची सुटका करून घेतली. नंतर या दोघांनी खुर्च्या, टेबल, जे हाताला येईल ते गुंडांना फेकून मारलं. केवळ एका मिनिटाच्या आत सशस्त्र गुंडांना या दोघांनी पिटाळून लावलं. हे सारं जवळच्या सीसीटीव्ही कॅमेऱ्यामध्ये कैद झालं. या घटनेचा व्हिडिओ पुढील दोन दिवसांत सोशल मीडियावर व्हायरल झाला. या दोघांचे शौर्य अनेकांना प्रेरणा देईल अशी अपेक्षा व्यक्त केली जात आहे.