नगरमधील पत्रकार उमेश शिवनाथ दारुणकर (वय ४०) यांचा मृतदेह मंगळवारी दुपारी रेल्वे रुळांवर आढळून आला. याप्रकरणी नगरच्या रेल्वे पोलिस स्टेशनला अकस्मात मृत्यूची नोंद करण्यात आली आहे. मृत्यूचे कारण अद्याप स्पष्ट झाले नसल्याची माहिती रेल्वे पोलिसांकडून मिळाली.
दारुणकर हे एका हिंदी दैनिकासाठी जिल्हा प्रतिनिधी म्हणून काम पाहत होते. दारुणकर हे गेल्या १५ वर्षांपासून पत्रकारिता क्षेत्रात कार्यरत होते. मंगळवारी दुपारी साडेतीनच्या सुमारास नगर-कल्याण रोडवरील रेल्वे उड्डाणपुलाखाली रेल्वे रुळांवर एक मृतदेह आढळून आला. याबाबत माहिती मिळाल्यानंतर रेल्वे पोलिसांनी घटनास्थळावरून मृतदेह ताब्यात घेतला. मृत व्यक्तीच्या खिशात असलेल्या ओळखपत्राच्या आधारे दारुणकर यांची ओळख पटली. उमेश दारुणकर यांच्या पश्चात आई, वडील, पत्नी, मुलगा, भाऊ असा परिवार आहे.