भारताच्या एकूण इंधनमागणीत जुलैमध्ये ३.३ टक्क्यांनी वाढ झाली आहे. देशभरात जुलैमध्ये एकूण १.७५ कोटी टन इंधन वापरण्यात आले. गेल्या वर्षीच्या जुलैच्या तुलनेत हे प्रमाण ३.३ टक्क्यांनी अधिक आहे, अशी माहिती पेट्रोलियम प्लॅनिंग अँड अॅनलिसीस सेलने दिली आहे.
पेट्रोलची मागणी जुलैमध्ये ८.८ टक्क्यांनी वाढली. जुलैमध्ये २५ लाख टन पेट्रोल वापरले गेले. स्वयंपाकाच्या गॅसच्या वापरामध्येही ९ टक्के वाढ झाली असून जुलैमध्ये २२ लाख टन एलपीजी खर्च झाला.
दरांत घसरण
पेट्रोल व डिझेलच्या दरांत काही दिवसांपासून घसरण होत आहे. एक ऑगस्टपासून पेट्रोलच्या दरात प्रतिलिटर ७४ पैसे तर, डिझेलच्या दरात प्रतिलिटर ३५ पैशांची कपात करण्यात आली आहे. मुंबईत रविवारी पेट्रोल व डिझेलचे दर प्रतिलिटर अनुक्रमे ७७.६५ व ६८.६६ रुपये नोंदवण्यात आले. आंतरराष्ट्रीय बाजारात कच्च्या इंधनाच्या किमतीत घसरण होत असून ब्रेण्ट क्रूड ऑइलचा दर प्रतिबॅरल ६० अमेरिकी डॉलरपर्यंत खालावला आहे.