इंदिरा गांधी आंतरराष्ट्रीय विमानतळावर बॉम्ब ठेवला असल्याचा फोन आल्यानंतर एकच खळबळ उडाली. सुरक्षा यंत्रणांनी तपास केल्यानंतर हा फोन अफवा असल्याचे समोर आले. मात्र, यामुळे विमान वाहतूक जवळपास सव्वा तास विस्कळीत झाली होती.
विमानतळ टर्मिनल-२ वर रात्री ८.५० वाजण्याच्या सुमारास एका अज्ञात व्यक्तीने विमानतळावर बॉम्ब ठेवला असून विमानतळाला वाचवू शकत असाल तर वाचवा, अशी धमकी दिली. या फोननंतर सुरक्षा यंत्रणांनी ताबडतोब विमानतळावर शोध मोहीम हाती घेतली. सीआयएसएफ, बीटीसी, दिल्ली पोलीस, विमानतळ प्राधिकरण, अग्निशमन दल आदींच्या जवानांनी, कर्मचाऱ्यांनी विमानतळ परिसराची आणि संशयित वस्तूंची तपासणी केली. तपासणी दरम्यान विमानतळ परिसर रिकामा करण्यात आला होता. मात्र, सुरक्षा यंत्रणांना बॉम्ब, संशयित वस्तू मिळाली नाही. दरम्यान, दिल्ली पोलिसांना आलेल्या फोन क्रमांकावरून एका व्यक्तीला ताब्यात घेण्यात आले असून आपण हा फोन केला नसल्याचे त्याने स्पष्ट केले आहे. त्यामुळे या प्रकरणाचा अधिक तपास सुरू आहे.