देशात सर्वाधिक पाऊस पडणाऱ्या मेघालयातील चेरापुंजीपेक्षा जास्त पाऊस यंदा पुण्यातील ताम्हिणी आणि साताऱ्यातील महाबळेश्वरमध्ये पडल्याची नोंद झाली आहे. राज्यात मान्सून उशिरा दाखल झाला असला तरी, ऑगस्टच्या पहिल्या आठवड्यात पावसाने बहुतांश ठिकाणी जोरदार एंट्री मारली आहे. एक जूनपासून आतापर्यंत ताम्हिणीमध्ये ५,९५९ मिलीमीटर आणि महाबळेश्वरमध्ये ५,७६४ मिलीमीटर पावसाची नोंद झाली आहे.
वातावरणातील अनुकूल बदलांमुळे पश्चिम महाराष्ट्रात कोसळणाऱ्या मुसळधार पावसाने लोकांच्या तोंडचे पाणी पळवले आहे. सह्याद्रीच्या पर्वतरांगांच्या भौगोलिक रचनेमुळे ढगांच्या निर्मितीला पोषक वातावरण मिळते. याचा फायदा पुणे जिल्ह्यातील ताम्हिणी घाट आणि परिसरालाही झाला आहे. सध्या तिथे मुसळधार पाऊस पडत आहे. विशेषत: गेल्या पंधरा दिवसात पडलेल्या मुसळधार पावसाने ताम्हिणीतील पावसाच्या आकडेवारीत लक्षणीय वाढ झाली आहे, असे हवामानशास्त्र विभागाचे हवामान विभाग प्रमुख अनुपम कश्यपी यांनी सांगितले.
ताम्हिणीबरोबरच राज्यातील सर्वांत लोकप्रिय थंड हवेचे ठिकाण असणाऱ्या महाबळेश्वरमध्येही आतापर्यंत चेरापुंजीपेक्षा जास्त पाऊस झाला आहे. महाबळेश्वरमध्ये १ जून पासून ५ हजार ७६४ मिलीमीटर पाऊस पडला आहे. दरवर्षी ६ ऑगस्टपर्यंत महाबळेश्वरमध्ये सरासरी ४ हजार ९५८ मिमी, तर सप्टेंबरअखेरीस ५ हजार ५३० मिमीची नोंद होते. यंदा ऑगस्टच्या पहिल्याच आठवड्यात हंगामाची सरासरी ओलांडून २ हजार ९६ मिमी पाऊस जास्त पडला आहे. गेल्या वर्षीही महाबळेश्वरमध्ये चेरापुंजीपेक्षा जास्त पावसाची नोंद झाली होती.