ठाण्यातील कौपिनेश्वर मंदिरामध्ये श्रावणी सोमवार आणि नागपंचमीचा सण असल्यामुळे गर्दी असताना या भागात संशयास्पद वस्तू आढळल्याने भीतीचे वातावरण होते. ठाणे पोलिसांनी घटनास्थळी धाव घेऊन ही वस्तू ताब्यात घेतली. त्यानंतर या वस्तूची तपासणी केल्यानंतर ती बॉम्बसदृश्य वस्तू आढळली. परंतु त्यामध्ये कोणत्याही प्रकारची विस्फोटके नव्हती. त्यामुळे या वस्तूपासून कोणताही धोका नव्हता. पोलिसांनी मात्र अशी कोणतीही संशयास्पद वस्तू सापडली नसल्याचे स्पष्ट केले आहे.
देशभरामध्ये काश्मीर प्रश्नावरून ‘हाय अॅलर्ट’ची परिस्थिती असून घातपाताच्या पार्श्वभूमीवर नागरिकांकडून सतर्कता बाळगली जात आहे. कौपिनेश्वर मंदिर श्रावणी सोमवार आणि नागपंचमीच्या पार्श्वभूमीवर गर्दीने भरले होते. परंतु सायंकाळी या भागात एक संशयास्पद वस्तू असल्याचे समजताच पोलिसांनी मंदिरात शोधाशोध सुरू केली होती. त्यावेळी एक पार्सलसारखी वस्तू आढळल्यानंतर पोलिसांनी त्याची तपासणी केली. ही वस्तू बॉम्बसदृश्य होती, मात्र त्यात विस्फोटक नव्हते, अशी माहिती पोलिस सूत्रांकडून समोर आली आहे. ठाणे नगर पोलिस ठाण्याचे वरिष्ठ पोलिस निरीक्षक मंगेश सावंत यांनी या वृत्ताला नकार दिला आहे. या भागात एक कामगार पिशवी विसरून गेला होता. त्यामध्ये त्याचे इअरफोन्स असल्यामुळे वायरीमुळे संशय बळावला होता, असा दावा त्यांनी केला.