कोपरखैरणे सेक्टर ७मध्ये रहाणाऱ्या एका विवाहितेने लग्नात ठरल्याप्रमाणे माहेरून दीड तोळे वजनाचे दागिने आणले नाहीत म्हणून विवाहितेचा तिच्या सासरकडील मंडळींनी मानसिक व शारीरिक छळ केल्याने विवाहितेने गळफास घेऊन आत्महत्याकेल्याची घटना नुकतीच घडली. या घटनेनंतर कोपरखैरणे पोलिसांनी मृत कोपरखैरणे सेक्टर ७ मधील महेश देवधरचा विवाह सोनूशी २०१८मध्ये झाला होता. लग्न ठरवताना तीन तोळे वजनाचे सोने महेशला हुंडा म्हणून देण्याचे ठरले होते. मात्र सोनूच्या आईची ऐपत नसल्याने तिने लग्नाच्या वेळी केवळ दीड तोळे सोने दिले होते. त्यातील दीड तोळे सोने देणे बाकी होते. या सोन्यासाठी सोनूचा पती व तिचे सासू-सासरे तिला वारंवार विचारणा करून तिला मानसिक त्रास देत होते. हे ती नेहमी आईला फोन करून सांगत असे. अखेर १२ जुलै रोजी सोनूच्या आईने गहाण ठेवलेले अर्धा तोळे वजनाचे कानातील फुले सोडवून आणून ते त्यांनी सोनूच्या सासरी नेऊन दिले होते. तसेच, उर्वरित एक तोळे सोने ऑगस्टमध्ये देण्याचे आश्वासन त्यांनी सासरच्या मंडळींना दिले होते. मात्र त्यानंतरही त्यांनी सोनूला मानसिक व शारीरिक त्रास देणे सुरूच ठेवले. त्यामुळे सोनूने १५ जुलै रोजी आईला फोन करून तिला माहेरी घेऊन जाण्याबाबत विनवणी केली होती. मात्र रात्र झाल्याने तिच्या आईने दुसऱ्या दिवशी तिला घेण्यासाठी येणार असल्याचे सांगून तिची समजूत काढली होती. मात्र सोनूने राहत्या घरात गळफास घेऊन आत्महत्या केली. सोनूचा पती महेश देवधर, सासरे राजू देवधर आणि सासू चिन्नमल देवधर या तिघांविरोधात आत्महत्येस प्रवृत्त केल्याप्रकरणी गुन्हा दाखल करण्यात आला आहे.