सर्पदंश होऊन मृत्युमुखी पडलेल्या पत्नीचा दशक्रिया विधी न करता इतरांवर अशी वेळ येऊ नये म्हणून सर्पदंशावर आधारित प्रबोधन कार्यक्रम आयोजित करून पत्नीला श्रद्धांजलीवाहिली. जळगाव बुद्रुक येथील काळू बुरकुल असे त्यांचे नाव आहे.
काळू बुरकुल यांच्या पत्नीला अकरा दिवसांपूर्वी विषारी सर्पाने दंश केला होता. उपचारास विलंब झाल्याने त्यांचा दुर्दैवी मृत्यू झाला. ही गोष्ट मनाला वेदनादायक असल्याने काळू बुरकुल यांनी ग्रामीण भागात किंबहुना आपल्या पंचक्रोशीत जनजागृती व्हावी या हेतूने दशक्रिया विधी न करता समाजप्रबोधनाचा कार्यक्रम ठेवला. यात येवला व नांदगाव येथील अनिसचे कार्यकर्ते व अनेक सर्पमित्रांना आमंत्रित करण्यात आले. या कार्यक्रमास उपस्थित सर्पमित्र गणेश सोमासे, संजय लावरे, एकनाथ पवार, मंगेश आहेर यांनी सापांची माहिती देवून त्याविषयीचे समज-गैरसमज दूर केले. अंनिसचे एम. बी. जगधने यांनी सूत्रसंचालन केले.