मयत, वास्त्यव्य नसलेल्यांची नावे सिलिंडर ग्राहकांच्या यादीत टाकून सिलिंडर खरेदी करणाऱ्या बोगस गॅस सिलिंडर एजन्सीचा गुन्हे शाखेच्या पथकाने गुरुवारी पर्दाफाश केला. ही सिलिंडर काळ्या बाजारात दुप्पट किमतीत विकणाऱ्या विजय एजन्सीचा व्यवस्थापक कोहिलदास नाडर याला पोलिसांनी अटक केली. कोहिलदास याने गेल्या तीन वर्षांत अशा मार्गाने तब्बल २.२ कोटी रुपये कमावले असल्याची धक्कादायक माहिती समोर आली आहे.
सायन-कोळीवाडा परिसरात राहणाऱ्या कोहिलदास नाडर याने हिंदुस्तान पेट्रोलियमची एजन्सी घेतली होती. त्याच्याकडील ग्राहकांच्या यादीत मागील काही वर्षांत कुठलेही बदल झाले नव्हते. जवळपास तीन हजार ग्राहकांची नावे यादीतून वगळण्यात आली नव्हती. त्यातील बहुतांश ग्राहक मयत होते तर उरलेले तो परिसर सोडून गेले होते. ही यादी पुढे करून नादार नाडर सिलिंडर खरेदी करायचा आणि दुप्पट किंमतीत हॉटेल्स आणि रेस्टॉरंट्सला विकायचा. याबाबत माहिती मिळताच पोलिस उपायुक्त दिलीप सावंत यांच्या मार्गदर्शनाखाली गुन्हे शाखा युनिट तीनचे पोलिस निरीक्षक संजय निकुंबे यांच्या पथकाने नाडरच्या विजय गॅस एजन्सीच्या कार्यालयावर छापा मारला. छाप्यामध्ये ६००० ग्राहकांच्या यादीतील जवळपास पन्नास टक्के ग्राहक बोगस असल्याचे पोलिसांच्या निदर्शनास आले.
दुप्पट किमतीला विक्री
कोहिलदास नाडर हा ६७८ रुपयाचे सिलेंडर तो १२०० रुपयांत विकायचा. या विक्रीतून तो एका दिवसांत वीस हजार रुपये कमवायचा. तीन वर्षांत त्याने २ कोटी २० लाख रुपये कमवले होते.