विक्रोळी पार्कसाईट परिसरात गुरुवारी रात्री एका विचित्र ट्रक अपघातात चार जणांचे नाहक बळी गेले. एक जण गंभीर आहे. धान्याने भरलेला हा ट्रक रस्त्यावरील गटाराचे झाकण तुटल्याने त्यात अडकून पलटी झाला आणि रस्त्यावर उभे असलेले पाच जण या ट्रकखाली दबले.
गुरुवारी रात्री ११ वाजण्याच्या सुमारास ही घटना घडली. धान्याने भरलेला हा ट्रक जात असताना ट्रकचं मागचं चाक गटाराचं झाकण तोडत आत रुतलं. त्यामुळे ट्रक पलटला. रस्त्याकडेला उभे असलेले पाच जण या ट्रकखाली दबले गेले. ट्रक धान्याच्या गोण्यांनी भरलेला होता. त्यामुळे लोक मदतीला धावूनही प्रत्यक्ष मदत झाली नाही. लोकांनी गोण्या काढायला घेतल्या. त्यानंतर अग्निशमन दलाच्या जवानांनी घटनास्थळी पोहोचत ट्रक उचलला. पण तोपर्यंत चार जण चिरडून ठार झाले होते. एक जण गंभीर जखमी आहे. त्याच्यावर राजावाडी रुग्णालयात उपचार सुरू आहेत.
या गटाराचे काम अलीकडेच आठवड्याभरापूर्वी झाले होते. ते निकृष्ट असल्यानेच झाकण तुटले गेले, असा स्थानिकांचा आरोप आहे.