बोरिवलीतील भटवाडी परिसरात राहणाऱ्या वामन जोशी या ७० वर्षीय वृध्दाची गुरुवारी दोन अज्ञात इसमांनी घरात घुसून हत्या केली. ही हत्या चोरीच्या हेतूने करण्यात आली नसल्याचे पोलिसांनी म्हटले आहे. याप्रकरणी बोरिवली पोलीस ठाण्यात हत्येचा गुन्हा दाखल करण्यात आला आहे.
भटवाडीतील लक्ष्मी वैभव इमारतीत तळमजल्यावर वामन जोशी हे मुलगा विलास सोबत राहत होते. त्यांचे याच परिसरात छोटे हॉटेल आहे. विलास गुरूवारी हॉटेलमध्ये होता. नेहमीप्रमाणे वडील सायंकाळच्या सुमारास हॉटेलमध्ये आले नाहीत म्हणून विलास घरी पाहायला गेला. त्यावेळी ते बेशुध्द अवस्थेत सापडले. जोशी यांना रुग्णालयात नेले असता डॉक्टरांनी त्यांना मृत घोषीत केले. वामन जोशी यांची गळा दाबून हत्या करण्यात आली. घरातील मौल्यवान वस्तू आणि रोकड चोरीला गेली नसल्याने या हत्येमागे काहीतरी दुसरे कारण असल्याचा पोलिसांचा प्राथमिक अंदाज आहे. जोशी राहत असलेली इमारत जुनी असून त्यामध्ये सीसीटीव्ही नाहीत. त्यामुळे पोलीस परिसरातील इतर सीसीटीव्हींच्या माध्यमातून हत्या करणाऱ्यांचा शोध घेत आहेत.