देशभरात निवडणुकीचे वारे वाहत असून, मतदानाचा टक्का वाढावा, यासाठी ठिकठिकाणी प्रबोधन करण्यात येत आहे. यामध्ये राजकीय पक्ष, सामाजिक संस्थांबरोबरच विविध संस्था पुढे येत आहेत. पुणेस्थित क्रस्ना डायग्लोस्टिक्स या संस्थेतर्फेदेखील मतदानाचा टक्का व महिलांमध्ये वाढत जाणाऱ्या थायरॉइड या आजाराविषयी प्रबोधन करण्यासाठी मतदान केलेल्या महिलांची मोफत आरोग्य तपासणी करण्यात येणार आहे. संस्थेच्या व्यवस्थापकीय संचालक पल्लवी जैन-भटेवरा यांनी ही माहिती मंगळवारी कालिदास कलामंदिरच्या हॉलमध्ये आयोजित पत्रकार परिषदेत दिली.
प्रत्येक एक हजार महिलांमागे ८० महिलांना थायरॉइड आजाराने ग्रस्त आहेत. वयाच्या तिशीनंतर आढळून येणारा हा आजार सध्या वयाच्या दहा ते चौदा वर्षे वयापासूनच आढळून येत असल्याची धक्कादायक बाब सध्या समोर येत आहे. बऱ्याच वेळा या आजाराची लक्षणे दिसूनसुद्धा महिला त्याकडे दुर्लक्ष करतात, परिणामी, आजाराला गंभीर स्वरूप प्राप्त होते. सध्या सर्वत्र निवडणुकांचे वातावरण असल्याने महिला मतदारांना आरोग्याबाबत सजग रहा, असा सल्ला आपल्या उपक्रम क्रस्ना डायग्नोस्टिक्सकडून देण्यात येणार आहे. या उपक्रमातून दोन्ही उद्देश साध्य होणार असल्याचे संस्थेच्या पल्लवी जैन-भटेवरा व रुची सोनवणे यांनी सांगितले.
या केंद्रांवर तपासणी
मतदान केल्या दिवसापासून बोटावरची शाई जाईपर्यंत तपासणीचा लाभ घेता येणार आहे. नाशिकमध्ये बिटको हॉस्पिटल, नाशिकरोड, स्वामी समर्थ हॉस्पिटल, अंबड, झाकीर हुसेन हॉस्पिटल द्वारका, इंदिरागांधी हॉस्पिटल, पंचवटी, नामको हॉस्पिटल, पेठरोड या केंद्रांवर तपासणी होणार आहे.