इम्रान खान यांच्या शपथविधी सोहळ्यासाठी पाकिस्तानात गेलेल्यानवज्योतसिंग सिद्धू यांच्यावर टीकेचा भडिमार सुरू असतानाच त्यांनी तिथं केलेल्या एका कृतीमुळं राजकीय वर्तुळात खळबळ उडाली आहे. शपथविधी सोहळ्याच्या आधी सिद्धू यांनी आज पाकचे लष्करप्रमुख कमर बाजवा यांची गळाभेट घेतली. भारताविरोधात दहशतवादी कारवायांना प्रोत्साहन देणाऱ्या पाकिस्तानी लष्कराच्या प्रमुखांना सिद्धूंनी दिलेल्या आलिंगनामुळं काँग्रेसमध्ये अस्वस्थता पसरली आहे.
काँग्रेसचे प्रवक्ते राशिद अल्वी यांनी सिद्धूंच्या या कृतीवर जाहीर नाराजी व्यक्त केली आहे. ‘सिद्धूंनी आमचा सल्ला घेतला असता तर आम्ही त्यांना पाकमध्ये जाऊच दिले नसते. ते मित्रत्वाच्या नात्यानं तिथं गेले आहेत. पण, मैत्री ही देशापेक्षा मोठी नाही. पाकिस्तानच्या गोळीबारात सीमेवर भारतीय जवान मारले जात आहेत. अशा परिस्थितीत सिद्धूंनी पाकच्या लष्करप्रमुखांची गळाभेट घेणं अत्यंत चुकीचं आहे,’ असं अल्वी म्हणाले. सिद्धूंवर टीका करतानाच अल्वी यांनी सरकारलाही आरोपीच्या पिंजऱ्यात उभं केलंय. ‘केंद्र सरकारनं परवानगी दिल्यामुळंच सिद्धू पाकिस्तानात गेले आहेत. सरकारनं त्यांना परवानगी नाकारायला हवी होती,’ असं ते म्हणाले. मात्र, सिद्धू यांच्या या गळाभेटीमुळं राजकारण तापण्याची चिन्हं आहेत.
तत्पूर्वी, सिद्धूनं पाकिस्तानात जाण्याच्या आपल्या निर्णयाचं समर्थन केलं. ‘पाकिस्तानात मी शांततेचा संदेश घेऊन जातो आहे. जोडणारे नेहमीच मोठे असतात,’ असंही त्यांनी सांगितलं.