दिल्लीतील ‘एम्स’ रुग्णालयात उपचार घेत असलेले माजी पंतप्रधान अटलबिहारी वाजपेयीं यांची प्रकृती चिंताजनक आहे. त्यांचे कुटुंबीय आणि नातेवाईकांना ग्वाल्हेर आणि आग्रा येथून बोलावून घेण्यात आलं आहे. त्याचवेळी अटलबिहारींच्या प्रकृतीविषयी माध्यमांशी बोलताना पुतणी कांती मिश्रा या अतिशय भावूक झाल्या. ‘त्यांना फक्त एकदाच भाषण करताना पाहायचं आहे, अशी मी देवाकडे प्रार्थना करते,’ असं सांगतानाच त्यांच्या डोळ्यांत पाणी आलं.
अटलबिहारी वाजपेयींच्या प्रकृतीत सुधारणा व्हावी, यासाठी देशभरात प्रार्थना करण्यात येत आहेत. ‘ते नक्की बरे होतील अशी मला खात्री आहे,’ असं त्यांची पुतणी कांती मिश्रा म्हणाल्या. फक्त एकदाच अटलबिहारी वाजपेयी यांना भाषण करताना पाहायचं आहे, यासाठी मी देवाकडे प्रार्थना करत आहे. त्यांची ती प्रतिमा आमच्या मनातून कधीच गेली नाही, असं सांगत त्यांच्याबद्दल बोलताना मिश्रा यांना रडू कोसळलं.