नुकत्याच पार पडलेल्या नवी मुंबई पोलिस भरती प्रक्रियेत प्रतीक्षा यादीत असलेल्या तीन महिला उमेदवारांना अज्ञात व्यक्तीने संपर्क साधून पोलिस भरतीत निवड करण्यासाठी त्यांच्याकडे प्रत्येकी एक लाख रुपयांची मागणी केल्याची तक्रार केली आहे. या प्रकाराची नवी मुंबईचे पोलिस आयुक्त हेमंत नगराळे यांनी गंभीर दखल घेतली असून अशा रकमेची मागणी करणाऱ्यांवर कारवाईचे आदेश दिले आहेत. त्यानुसार कळंबोली पोलिसांनी अज्ञात व्यक्तीविरोधात गुन्हा दाखल करून त्याचा शोध सुरु केला आहे.
तक्रारदार महिला जुन्नरची असून ती फेब्रुवारी २०१८मध्ये नवी मुंबई पोलिस आयुक्तालयाकडून घेण्यात आलेल्या पोलिस भरती प्रक्रियेत सहभागी झाली होती. तिला मैदानी व लेखी चाचणी मिळून एकूण २००पैकी १५८ गुण मिळाल्यामुळे ती प्रतीक्षा यादीतील तिसऱ्या क्रमांकावर होती. १० मे रोजी अविनाश ढामसे नामक व्यक्तीने तिला नवी मुंबई पोलिसात भरती व्हायचे असल्यास एक लाख रुपये द्यावे लागतील, असे सांगितले. मात्र त्यांनी नकार दिला. या महिलेने पोलिस भरतीपूर्व प्रशिक्षण देणाऱ्या श्रीकांत मदणे यांना हा प्रकार सांगितल्यावर अन्य दोघा महिलांनाही अशा प्रकारचे प्रस्ताव आल्याचे कळले. त्यानंतर मदणे यांनी पोलिस आयुक्त हेमंत नगराळे यांची भेट घेऊन त्यांना याबाबत माहिती दिली.