तारापूर अणुऊर्जा प्रकल्पातील नोकऱ्यांमध्ये स्थानिकांना डावलल्याने संतप्त झालेल्या परिसरातील ग्रामस्थांनी आज सकाळी पहाटे साडे पाच वाजता पाचमार्ग येथे तीव्र आंदोलन करत प्रकल्पातील बसेसवर तुफान दगडफेक आणि तोडफोड केली. यात तीन चार कामगार जखमी झाले आहेत.
तारापूर अणुऊर्जा प्रकल्पात वेल्डर व फिटरच्या जागेसाठी मुलाखतीचे आयोजन करण्यात आले होते. या मुलाखतीत स्थानिक तरुणांनी तसेच अन्य जिल्ह्यातील व राज्याबाहेरी तरुणांनीदेखील मुलाखती दिल्या होत्या.
या मुलाखतींमध्ये सर्व स्थानिक तरूणांना सरसकट नापास करण्यात आले. बाहेरून आलेल्या तरूणांना मात्र तत्काळ नोकऱ्या देण्यात आल्याने स्थानिकामध्ये असंतोष भडकला. त्यांनी आपला राग व्यक्त करत ही तोडफोड केली.
सोमवारी पहाटे अणु ऊर्जा प्रकल्पाच्या बसेस पहिल्या पाळीच्या कामगारांना घेऊन चालल्या असता प्रकल्पापासून चार किमी अंतरावरील पाच मार्ग येथे स्थानिक नागरिकांनी प्रकल्पातील भ्रष्ट अधिकाऱ्यांविरोधात आपला राग व्यक्त करत या बसेसवर तुफान दगडफेक केली.
स्थानिकांनी केलेल्या या दगडफेकीत बस मधील तीन ते चार कामगार जखमी झाले असून त्याना उपचारसाठी रूग्णालयात हलविण्यात आले आहे.