अंदमानमध्ये मान्सून दाखल होण्यासाठी अनुकूल परिस्थिती असून येत्या ४८ तासांमध्ये मान्सून अंदमानात दाखल झाल्याची घोषणा हवामान विभागाकडून करण्यात येऊ शकते. हवामान विभागाकडून गेल्या आठवड्यात वर्तवण्यात आलेल्या अंदाजानुसार २३ मेपर्यंत मान्सून अंदमानात दाखल होण्याची शक्यता होती.
मान्सून सध्या दक्षिण अंदमानमध्ये येण्यासाठी वाटचाल करत आहे. याच कालावधीमध्ये मिकुनू हे तीव्र चक्रीवादळ अरबी समुद्रात निर्माण झाले आहे. मात्र मिकुनू हे चक्रीवादळ नैऋत्येकडे ओमानच्या दिशेने सरकत असल्याने या चक्रीवादळाचा अंदमानमध्येही न धडकलेल्या मान्सूनच्या प्रवासावर परिणाम होण्याची शक्यता नसल्याचे प्रादेशिक हवामान विभागाचे मुख्य प्रवक्ते विश्वंभर सिंग यांनी सांगितले.
अंदमानमध्ये मान्सून दाखल होण्याचा देशात मान्सून दाखल होण्याशी आणि त्यानंतर त्याच्या मुंबई किंवा पुढच्या प्रवासाशी संबंध नाही, असेही सिंग यांनी स्पष्ट केले. मान्सूनची शाखा कोणत्या पद्धतीने सक्रीय होत आहे यावर मान्सूनचा पुढचा प्रवास अवलंबून आहे. केरळजवळही पाऊस आहे. त्याचप्रमाणे दक्षिण द्विपकल्पाजवळ ढगांची गर्दी असल्याने मान्सूनच्या पुढच्या प्रवासासाठी अनुकूल वातावरण असल्याचा अंदाज हवामान विभागातर्फे वर्तवण्यात येत आहे. गुरुवारी सकाळी झालेल्या नोंदणीनुसार मध्य महाराष्ट्रात काही ठिकाणी तर कोकण आणि गोव्यात हलक्या स्वरूपाचा पाऊस पडला. शनिवारी दक्षिण कोकण आणि गोव्यामध्ये तुरळक ठिकाणी पावसाची शक्यता आहे.