वडिलांनी मोबाइल काढून घेतल्याच्या रागात तरुणीने आत्महत्या केल्याची धक्कादायक घटना समोर आली आहे. नालासापोरात ही घटना घडली आहे. मुलगी जास्त वेळ मोबाइलमध्ये घालवत असल्याने तरुणीच्या वडिलांनी मोबाइल काढून घेतला होता. पण यामुळे नाराज झालेली आपली मुलगी आत्महत्येचं टोकाचं पाऊल उचलेलं याची त्यांना कल्पनाही नव्हती.
सोमवारी रात्री २२ वर्षीय श्रद्धा ढवळेच्या पालकांनी मुलगी बेपत्ता झाल्याची तक्रार दाखल केली होती. श्रद्धा बेपत्ता होण्याआधी तिच्या वडिलांनी तासनतास मोबाइलमध्ये वेळ घालवत असल्याने तिला सुनावलं होतं. मुलीला मोबाइलचं व्यसन लागलं असल्याने त्यांनी मोबाइल काढून घेतला होता. यामुळे रागावलेली श्रद्धा घरातून निघून गेली होती.
रात्री पावणेदहा वाजले तरी श्रद्धा घरी न परतल्याने तिच्या वडिलांनी आणि शेजाऱ्यांनी शोध घेण्यास सुरुवात केली. मुलीचा शोध लागत नसल्याचं लक्षात येताच त्यांनी नालासोपारा पोलीस ठाण्यात धाव घेतली आणि बेपत्ता झाल्याची तक्रार केली.
मंगळवारी जवळच्याच एका विहिरीत श्रद्धाचा मृतदेह आढळला. पोलिसांनी याप्रकरणी अपघाती मृत्यूची नोंद केली आहे.