ठाण्यातील घोडबंदर रोडवरील माजीवडा परिसरामध्ये मलनिस्सारण वाहिनीच्या कामादरम्यान महानगर गॅसची वाहिनी फुटल्याने आपत्कालीन परिस्थिती निर्माण झाली होती. दुपारी एक वाजण्याच्या सुमारास ही घटना घडली. आपत्कालीन मदत कक्ष, वाहतूक पोलिस, अग्निशमन विभागाच्या पथकाने घटनास्थळी पोहचून या भागातील संपूर्ण वाहतूक थांबवून या पाइपवर पाण्याचा फवारा सुरू करण्यात आला होता. तर वाहतुकही पर्यायी मार्गाने वळवण्यात आली होती.
गॅसवाहिनी फुटल्याने याभागातून गॅस पुरवठा होणाऱ्या लोढा कॉम्प्लेक्स, खारेगाव आणि साकेत कॉम्प्लेक्सचा घरगुती गॅस सेवा विस्कळीत झाली होती. महानगर गॅसच्या पथकाने ही वाहिनी दुरुस्त केल्यानंतर सायंकाळी गॅसपुरवठा सुरळीत झाल्याचे ठाणे महापालिकेकडून स्पष्ट करण्यात आले.
ठाणे महापालिकेच्या नव्या मलनिस्सरण वाहिन्यांची कामे शहराच्या विविध भागांमध्ये सुरू असून त्यामुळे रस्त्याच्या खोदकाम केले जात आहे. गुरुवारी दुपारी माजिवडा परिसरामध्ये खोदकाम सुरू असताना त्याच्या तडाख्याने येथील एक भूमिगत महानगर गॅसची वाहिनी फुटून गॅस बाहेर पडू लागला होता. याची माहिती मिळताच आपत्ती व्यवस्थापन विभागाचे पथक, अग्निशमन विभाग, वाहतूक पोलिसांनी घटनास्थळी पोहचून येथील रहदारी बंद केली. येथून प्रवास करणाऱ्या वाहनांना पर्यायी मार्गाने वळवण्यात आले. तर महानगर गॅसच्या पथकाला पाचारण करण्यात आले. हे पथक पोहोचेपर्यंत या वाहिनीवर पाण्याचा फवारा मारणे सुरू होते. उन्हाचा ताप जास्त असल्यामुळे येथील गॅसवाहिनी जवळ थंडावा राखण्याचा प्रयत्न सुरू करण्यात आला होता. महानगर गॅसच्या पथकाने ही वाहिनी दुरुस्ती करण्याचे काम सुरू केले. दुपारी एक वाजल्यापासून या वाहिनीतून होणारा गॅसपुरवठा बंद झाल्यामुळे या भागातील नागरिकांची सेवा खंडित झाली होती. सायंकाळी साडे चारवाजेपर्यंत ही सेवा सुरळीत करण्यात आल्याची माहिती महापालिका प्रशासनाकडून देण्यात आली.