मध्य, हार्बर व पश्चिम रेल्वेवर उद्या, रविवारी सकाळी १०.३० ते दुपारी ४ पर्यंत मेगाब्लॉक घेतला जाणार आहे. मध्य रेल्वेवर कल्याण आणि विठ्ठलवाडी स्थानकांमधील पुलावरील गर्डर बदलण्याच्या कामासाठी कल्याण आणि कर्जतमध्ये अप आणि डाऊन मार्गावर स. १०.३० ते दु. ३ पर्यंत ब्लॉक घेतला जाणार आहे. त्यामुळे लोकल सेवांवर परिणाम होणार आहे. या मेगाब्लॉकमुळे सीएसएमटी ते कल्याण दरम्यान अन्य कोणताही ब्लॉक घेतला जाणार नाही.
रद्द होणाऱ्या लोकल
सीएसएमटीहून कर्जत-खोपोली-बदलापूर-अंबरनाथच्या दिशेने जाणाऱ्या लोकल : स. ९.१५ ते दु. ३.५३
ठाण्याहून कर्जत-बदलापूरसाठी जाणाऱ्या लोकल : स. १०.४८ ते दु. ३.०६
अंबरनाथ-बदलापूर-कर्जत-खोपोली ते सीएसएमटीपर्यंत जाणाऱ्या लोकल : स. १०.२५ ते दु. ३.२३
कर्जतहून ठाण्याच्या दिशेने जाणारी दु. १.२७ ची लोकल.
मेल-एक्स्प्रेसवरील परिणाम
एलटीटी-काकिनाडा एक्स्प्रेस, मुंबई-तिरुनवेली नागरकॉइल एक्स्प्रेस, मुंबई-हैद्राबाद एक्स्प्रेस ब्लॉक कालावधीत कर्जत ते पनवेल मार्गे जातील. या गाड्या सुमारे अर्धा तास उशिराने धावतील. हैद्राबाद-मुंबई एक्स्प्रेस, चेन्नई-मुंबई एक्स्प्रेस, कोइम्बतूर-एलटीटी एक्स्प्रेस कर्जत-पनवेल मार्गे जातील.
मध्य रेल्वेने भांडुप येथील पुलाचा गर्डर उभारण्यासाठी रविवारी मध्यरात्री १२.१० ते पहाटे ५.४५ पर्यंत मेगाब्लॉक घेतला आहे. या ब्लॉकमुळे मेल-एक्स्प्रेस सुमारे १५ ते २० मिनिटे उशिराने धावतील. एलटीटीहून सुटणाऱ्या मेल-एक्स्प्रेस विद्याविहार ते ठाणे दरम्यान डाऊन जलद मार्गावर वळविण्यात येणार आहेत.
हार्बरवर पाच तास सेवा खंडीत
हार्बरवर कुर्ला-वाशी अप आणि डाऊन मार्गावर स. ११.१० ते दु. ४.१० पर्यंत ब्लॉक आहे. सीएसएमटी ते पनवेल, बेलापूर, वाशीपर्यंत स. १०.३४ ते दु. ३.३९ आणि पनवेल, बेलापूर, वाशी ते सीएसएमटीपर्यत स. १०.२१ ते दु. ३.४१ पर्यंत सेवा खंडीत राहणार आहे. सीएसएमटी ते कुर्ला आणि वाशी ते पनवेलपर्यंत विशेष लोकल चालवण्यात येतील.
पश्चिम रेल्वेवर काही लोकल रद्द
पश्चिम रेल्वेवर रविवारी सांताक्रूझ ते माहीम अप आणि डाऊन जलद मार्गावर स. १०.३५ ते दु. ३.३५ पर्यंत ब्लॉक घेण्यात येणार आहे. सांताक्रूझ ते माहीम दरम्यान अप आणि डाऊन जलद वाहतूक अप आणि डाऊन धिम्या मार्गावरून चालवण्यात येणार आहे. ब्लॉकमध्ये काही लोकल रद्द केल्या जाणार आहेत.