अकरावीत पाहिजे त्या महाविद्यालयात प्रवेश मिळाला नाही म्हणून अनेक विद्यार्थी बारावीत महाविद्यालय बदलतात. मात्र ही प्रक्रिया ऑफलाइन होत असल्यामुळे त्यात मोठ्या प्रमाणावर भ्रष्टाचार होतो. परिणामी ही प्रक्रियाही ऑनलाइन करण्याचा मानस शिक्षण विभागाने गतवर्षी व्यक्त केला होता. मात्र अद्याप या प्रक्रियेबाबत शासनस्तरावर कोणत्याही हालचाली सुरू झाल्या नसल्याने विद्यार्थ्यांसमोर प्रवेश ऑफलाइन घ्यावा की नाही असा प्रश्न उभा राहिला आहे.
अनेक महाविद्यालयांमध्ये अकरावीत मुले नापास होतात किंवा काही कारणांमुळे महाविद्यालय सोडून जातात. परिणामी तेथेही बारावीसाठी काही जागा रिक्त होतात. त्यामुळे त्या जागांवर प्रवेश प्रक्रिया पार पडते. अकरावी ऑनलाइनमध्ये आपल्याला पाहिजे ते महाविद्यालय मिळाले नाही म्हणून सुमारे ३० टक्के विद्यार्थी बारावीच्या या प्रवेश प्रक्रियेत सहभागी होतात, असे शिक्षण विभागातर्फे करण्यात आलेल्या पाहणीत समोर आले. ही सर्व प्रक्रिया ऑफलाइनच होत असल्यामुळे येथे अनेक आर्थिक व्यवहार होतात. त्यामुळे अकरावी प्रवेश ऑनलाइन करण्याच्या मुख्य उद्देशालाच हरताळ फासला जात आहे. म्हणून शालेय शिक्षण विभागाने बारावीचे प्रवेशही ऑनलाइन करण्याचे जाहीर केले होते. मागच्या वर्षी याबाबत तयारीही सुरू केली होती. मात्र आयत्यावेळी तयारीअभावी प्रवेश प्रक्रिया ऑफलाइनच पार पडली होती. यावर्षी ती ऑनलाइन होण्याची अपेक्षा व्यक्त होत होती. परंतु अद्याप शिक्षण उपसंचालक कार्यालयात याबाबत कोणत्याही सूचना न आल्यामुळे या प्रक्रियेबाबत कोणतीही उपाययोजना करण्यात आलेली नाही. बारावी प्रवेश प्रक्रियेसंदर्भात सूचना प्राप्त झाल्यावर पुढील कार्यवाही केली जाईल, असे उपसंचालक राजेंद्र अहिरे यांनी सांगितले.
पालक, कॉलेजांमध्ये संभ्रम
शिक्षण उपसंचालक कार्यालयात पालकांनी चौकशी सुरू केली असून याबाबत निर्णय न झाल्यामुळे पालक व कॉलेजांमध्ये नेमकी ही प्रवेश प्रक्रिया कशी पार पडणार याबाबत संभ्रम निर्माण झाला आहे. २५ ते ३० एप्रिलच्या दरम्यान अकरावीचा निकाल लागणे अपेक्षित आहे. निकाल लागल्यावर कॉलेजांमधील रिक्त जागांचा तपशील समोर येईल. त्यानंतर कॉलेजांमध्ये प्रवेश प्रक्रिया सुरू होईल. शासनाने हा निकाल लागण्यापूर्वी तरी प्रवेश प्रक्रियेबाबत निर्णय घ्यावा, अशी मागणी पालकांकडून होत आहे.