अभिनेता आदिनाथ कोठारे आणि अभिनेत्री उर्मिला कोठारे हे दोघेही अवघ्या अडिच महिन्याच्या जिजासोबतचा प्रत्येक क्षण कॅमेऱ्यात टिपत आहेत. जिजाबरोबर फूलटू धम्माल करण्यात मश्गूल असलेल्या या जोडप्याने चक्क जिजासोबत स्विमिंगही केलंय. उर्मिलाने लहानग्या जिजाला स्विमिंग पूलमध्ये उतरवून तिला पोहायला शिकवत आहे. विशेष म्हणजे उर्मिलाने या स्विमिंगचा व्हिडिओ तिच्या इन्स्टाग्राम अकाऊंटवर व्हायरलही केला आहे.
या व्हिडिओमध्ये उर्मिला जिजाला पोहायला शिकवताना दिसत आहे. पोहोण्यामुळे बालकांचं आरोग्य सदृढ राहतं, असं उर्मिलानं स्पष्ट केलंय. ‘मुलं जन्मत:च पोहायचं शिकून येतात. जन्मापासूनच पोहायला शिकल्यास मुलांचे स्नायू बळकट होतात. शिवाय त्यांच्या डाव्या आणि उजव्या मेंदूचाही विकास होतो,’ असं उर्मिलानं इन्स्टाग्राम पोस्टमध्ये लिहिलं आहे. ‘तुमच्या बाळाला सुदृढ ठेवायचं असेल तर जन्माला आल्यापासूनच त्याला पोहायला शिकवा,’ असा सल्लाही तिने दिला आहे.