उन्हातान्हात ड्युटी बजावणाऱ्यांमध्ये मुंबईतील वाहतूक पोलिसांचा समावेश असतो. अशाच भरउन्हात नाना चौकात ड्युटी बजावणारे ताडदेव वाहतूक पोलिस विभागातील हवालदार राजेंद्र जाधव (४९) यांना सोमवारी नाना चौक येथे हृदयविकाराचा झटका आला. त्यांच्यावर भाटिया रुग्णालयात उपचार सुरू असून, दोन दिवसांनंतरही ते शुद्धीवर आलेले नाहीत. जाधव यांच्या मुलावरही हृदयाशी संबंधित शस्त्रक्रिया झाली असून, त्याचा उपचारांचा खर्चही मोठा आहे. अशा स्थितीत जाधव यांच्या कुटुंबीयांना आर्थिक सहाय्याची आवश्यकता भासत आहे.
वरळीतील बीडीडी चाळीत राहणारे जाधव सेवेवर जात असतानाच भरदुपारच्या उन्हाने त्यांना चक्कर आली. जमिनीवर कोसळलेल्या जाधवांना ताडदेव पोलिसांच्या व्हॅनने भाटिया रुग्णालयात दाखल करण्यात आले. त्यांच्यावरील उपचारांसाठी आतापर्यंत सुमारे दीड लाख रुपये खर्च झाला आहे. दुसरीकडे त्यांच्या सहा वर्षांच्या मुलावर अॅन्जिओप्लास्टी झाली आहे. या शस्त्रक्रियेनंतर त्याला रक्त पातळ करण्यासाठी नियमित इंजेक्शन द्यावे लागत असून, त्याची किंमत प्रत्येकी ७५० रुपये आहे. त्यामुळे जाधव यांच्या कुटुंबीयांपुढे आर्थिक समस्या उभी राहिली आहे. त्यांची ही स्थिती पाहून वाहतूक पोलिस उपायुक्त अशोक दुधे यांनी मदतीचा हात पुढे केला असून, त्यांनी रुग्णालयातील आतापर्यंतच्या खर्चाची जबाबदारी घेतली आहे.