केंद्रीय माध्यमिक परीक्षा मंडळाने (सीबीएसई) इयत्ता दहावीचा गणित आणि बारावीचा अर्थशास्त्राचा पेपर पुन्हा घेण्याचा निर्णय बुधवारी घेतल्याने विद्यार्थ्यांचा हिरमोड झाला आहे. तर, पालकांना सुट्ट्यांमध्ये फिरण्याचे आखलेले बेत ऐनवेळी रद्द करावे लागले आहे. त्यामुळे या निर्णयाचा विद्यार्थी आणि पालकांना एक प्रकारचा फटका बसला असल्याचे परीक्षार्थ्यांनी सांगितले. ‘सीबीएसई’ने हे दोन्ही पेपर फुटल्याने ते पुन्हा नव्याने घेण्याचा निर्णय घेतला आहे.
पोतदार इंटरनॅशनल स्कूलचा इयत्ता दहावीला असणारा विद्यार्थी सोहन जोशी म्हणाला, हा निर्णय चुकीचा आहे. पेपर झाल्याने आम्ही आनंदात होतो. सीबीएसईचे अधिकारी म्हणतात की, गणिताचा पेपर पुन्हा घ्यावा लागणार आहे. गणिताचा पेपर कठिण असतो. अशातच काही लोकांच्या पेपर फोडण्याच्या चुकीची शिक्षा सर्व विद्यार्थ्यांना का व्हावी? गेल्या महिन्यापासून आम्ही परीक्षेच्याच वातावरणात होतो. यापुढे अजून किती दिवस परीक्षेच्याच वातावरणात राहावे लागणार? अजून किती त्रास आम्हाला सहन करावा लागणार, याची माहिती नाही. जीजी इंटरनॅशनल स्कूलमध्ये इयत्ता बारावीत शिकणारा अश्वथी जीजी म्हणाली की, माझे पेपर संपल्याने आम्ही सर्व फिरण्यासाठी केरळला जाणार होतो. तिकीटेदेखील आरक्षित केली होती. मात्र, आता ती रद्द करण्यात आली आहेत. उन्हाळ्याच्या सुट्ट्यांमध्ये पुन्हा तिकिटे मिळण्याची शक्यता कमी आहे. सर्व पेपरमध्ये अर्थशास्त्राचा पेपर सर्वांत सोपा होता. मात्र, काही लोकांच्या वागण्यामुळे आम्हाला पुन्हा पेपर देण्याचा त्रास सहन करावा लागत आहे. तर, पालक म्हणाले की, मुलांची परीक्षा संपल्याने आम्ही बाहेरगावी जाण्याचे बेत आखले होते. मात्र, आता काही पेपर पुन्हा होणार असल्याने बेत रद्द करावे लागले. त्यातच परीक्षेची तारीख अद्याप जाहीर झालेली नाही. त्यामुळे पुढचे काहीच नियोजन करता येत नाही. यामुळे विद्यार्थ्यांसोबतच पालकांनाही मनस्ताप सहन करावा लागतो आहे.
गणित आणि अर्थशास्त्राचा पेपर पुन्हा होणार असल्याचे जाहीर झाल्यावर सुट्टीचा आनंद घेणाऱ्या विद्यार्थ्यांनी पुन्हा पुस्तके हाती घेतली आहेत. विद्यार्थ्यांनी पुन्हा अभ्यासाला सुरुवात केली असून, मित्र-मैत्रिणींसोबत अभ्यासावर चर्चा करण्यासही सुरुवात केली आहे. आता पेपरच्या नव्या तारखा ‘सीबीएसई’ने लवकर जाहीर कराव्यात, अशी मागणी विद्यार्थ्यांनी केली आहे.