पिण्याच्या पाइपलाइन खालून जाणाऱ्या मलवाहिनी तुंबल्यामुळे चेंबरमधून हे सांडपाणी बाहेर पडून पिण्याच्या पाण्यात मिसळल्याने नागरिकांना उलट्या आणि जुलाबाचा त्रास सुरू झाला. लहान मुलांना त्याची बाधा झाल्याची घटना डोंबिवली पश्चिमेकडील घनश्याम गुप्ते रोड परिसरात घडली. या मुलांना उपचारासाठी रुग्णालयात दाखल करण्यात आले आहे. घटनेची माहिती मिळताच पालिका प्रशासनाने पाणीपुरवठा बंद करून चेंबर सफाईचे काम हाती घेतले असून नागरिकांना टँकरद्वारे पाणीपुरवठा केला जात आहे.
पालिकेच्या पाणीपुरवठा वाहिनीवरून आलेले पाणी डोंबिवली पश्चिमेकडील गंगोत्री, पपली, मधुकर निवास, शांताराम व्हिला या इमारतीवरील टाकीत भरून हे नागरिकांना पिण्यासाठी देण्यात आले. या पाण्याला गटाराच्या पाण्याची दुर्गंधी येत असल्यामुळे काही जणांनी इमारतीवरील टाकीतील पाणी तपासले असता पिण्याच्या पाण्यातून सांडपाणी येत असल्याचे आढळून आहे. मात्र तोपर्यंत हे पाणी काही नागरिकांनी प्यायल्याने या त्यांना उलट्या, जुलाबाचा त्रास सुरू झाला. यात लहान मुले बाधित झाल्यामुळे नागरिकांनी संताप व्यक्त केला. साडेतीन वर्षांची सनवी गुगरे, १२ वर्षांचा वेद कार्लेकर यांच्यासह परिसरातील आणखी काही मुलांना या आजारामुळे रुग्णालयात दाखल करण्याची वेळ आल्याचे रहिवाशांचे म्हणणे आहे.
पालिकेची बेफिकिरी
या पाण्याबाबत नागरिकांनी पालिका प्रशासनाकडे तक्रार केली आहे. ज्या इमारतींकडून तक्रार प्राप्त झाल्या आहेत त्या इमारतींना पालिका प्रशासनाकडून पिण्यासाठी टँकरने पाणीपुरवठा केला जात आहे. मात्र परिसरात किती इमारतींना याची बाधा झाली आहे, याची तपासणी करण्याची जबाबदारी पालिका प्रशासनाची असतानाही तक्रार न करणाऱ्या इमारतीमधील रहिवाशांची चौकशीही केली जात नसल्याचा आरोप नागरिकांनी केला आहे.
सांडपाण्याची वाहिनी तुंबल्यामुळे सांडपाणी पिण्याच्या पाण्यात मिसळले. हे चेंबर साफ करण्याचे काम सुरू आहे. पिण्याचा पाणीपुरवठा बंद करण्यात आला असून बुधवारी काम पूर्ण झाल्यावर तो पूर्ववत केला जाईल. स्वच्छ पाणी येईपर्यंत पुढील दोन दिवस या इमारतींना टँकरद्वारे पाणीपुरवठा केला जाईल.