छत्तीसगडमधील एका खासगी कॉलेजमध्ये मानवतेला काळीमा फासणारी घटना घडली आहे. ७ महिन्यांची गर्भवती असलेल्या एका विद्यार्थिनीला कॉलेज प्रशानसनाने जबरदस्तीने डान्स करायला भाग पाडले. डान्स केला नाही तर कमी गुण देऊ, अशी धमकी दिली. विद्यार्थिनीच्या तक्रारीची दखल जिल्हाधिकाऱ्यांनी घेतली असून कॉलेज प्रशासनाला कारणे दाखवा नोटीस बजावली आहे.
संत हरकेवल बीएड कॉलेजमध्ये हा संतापजनक प्रकार घडला आहे. प्रतिभा मिंज या विद्यार्थिनीनं ऑगस्ट २०१७ मध्ये बीएडमध्ये प्रवेश घेतला होता. या कॉलेजने विद्यार्थिनींसाठी काही नियम बनवले आहेत. त्यानुसार, कोणतीही विद्यार्थिनी आपल्या दोन वर्षाच्या बीएड शैक्षणिक वर्षात गर्भधारणा करू शकत नाही. प्रतिभा या विद्यार्थिनीनं ज्यावेळी कॉलेजमध्ये प्रवेश घेतला त्यावेळी ती ३ महिन्यांची गर्भवती होती. परंतु, कोर्स पूर्ण होईपर्यत बाळाला जन्म देणार नाही, असे कॉलेज प्रशासनाने तिच्याकडून शपथपत्र लिहून घेतले होते. नियमांचे उल्लंघन केल्याचे सांगत परीक्षेला न बसून देण्याची धमकी कॉलेज प्रशासनाने दिल्याचा आरोप प्रतिभानं केला आहे.
कॉलेजमध्ये प्रवेशानंतर प्राध्यापकाकडून सतत मानहानी करण्यात आली. डिसेंबर महिन्यात ७ महिन्याची गर्भवती असताना एका प्रॅक्टिकल परीक्षेसाठी बोलावले व माझ्या इच्छेविरुद्ध मला वर्गात सर्व विद्यार्थ्यांसमोर डान्स करायला लावला, असा आरोप प्रतिभानं केला आहे. जर डान्स केला नाही तर परीक्षेत कमी गुण देऊ, अशी धमकी कॉलेज प्रशासनाने दिली होती, असं प्रतिभा म्हणाली. धमकीला घाबरून मी डान्स केला तर सर्वजण हसत होते. यामुळे माझ्या मनाला फार वेदना झाल्या, असं प्रतिभानं सांगितले. सरगुजाचे जिल्हाधिकारी किरण कौशल यांच्याशी याबाबत विचारणा केली त्यावेळी कॉलेज प्रशासनाला कारणे दाखवा नोटीस बजावली आहे, असं त्यांनी सांगितले.