ठाण्यातील उथळसर रोडवरील समर्थ आर्केड इमारतीच्या पाचव्या मजल्यावरील बिल्डर संजय भालेराव यांच्या कार्यालयास आगी लावण्यात त्यांच्या कर्मचाऱ्याचा हात असल्याचे समोर आले आहे. या प्रकरणी भालेराव यांनी कर्मचारी अमोल कुरूंद (२३) याच्याविरोधात राबोडी पोलिस ठाण्यात गुन्हा दाखल केला आहे. कार्यालयातील आठ हजार रुपये चोरून बाटलीतून आणलेल्या पेट्रोलद्वारे कार्यालयास आग लावून १२ लाखांचे नुकसान केल्याचा आरोप करण्यात आला आहे. या प्रकरणी राबोडी पोलिसांकडून तपास सुरू करण्यात आला आहे.
ठाण्यातील समर्थ आर्केड इमारतीच्या पाचव्या मजल्यावरील संजय भालेराव या बिल्डरच्या कार्यालयास १२ मार्च रोजी रात्री ११च्या सुमारास भीषण आग लागली होती. ही आग विझवण्यासाठी अग्निशमन दलाच्या जवानांना दीड तासाहून अधिक काळ प्रयत्न करावे लागले होते. यामध्ये अग्निशमन दलाचा एक जवानही किरकोळ जखमी झाला होता. या आगीच्या प्रकरणामध्ये या कार्यालयातील कर्मचारी अमोल कुरूंद याचा सहभाग असल्याचे समोर आले होते. बनावट चावीच्या सहाय्याने कार्यालय उघडून आठ हजार रुपयांची चोरी केली. तसेच चोरी उघड होऊ नये म्हणून पेट्रोलने कार्यालयास आग लावली होती. या प्रकरणी भालेराव यांनी केलेल्या तक्रारीनुसार राबोडी पोलिसांनी आरोपी कुरुंद याच्या विरोधात शुक्रवारी गुन्हा दाखल करून त्याला अटक केली आहे.