जिल्हा सहकारी बँकेची नगर तालुक्यातील वाळकी शाखेचे कुलूप तोडून चोरट्यांनी चोरीचा प्रयत्न केला. कुलूप तोडून चोरटे चाळीस लाख रुपयांची रक्कम असलेल्या तिजोरीपर्यंत गेले होते. परंतु तिजोरीला लावण्यात आलेला सायरन वाजल्यानंतर चोर पसार झाल्याचे समोर आले आहे.
बँकेचे शाखाधिकारी रामदास दशरथ कासार यांच्या फिर्यादीवरून अज्ञात चोरट्यांविरुद्ध चोरीचा प्रय़त्न केल्याचा गुन्हा नोंदविण्यात आला आहे. वाळकी गावात जिल्हा सहकारी बँकेची शाखा सेवा सोसायटीच्या इमारतीत आहे. गुरुवारी सायंकाळी बँक व सोयायटीचे कार्यालय बंद करण्यात आले होते. रात्री अज्ञात चोरट्यांनी बँकेच्या लोखंडी ग्रीलचे, त्यानंतर शटरचे सेंटर लॉक तोडले. सेंटर लॉकच्या शेजारी असलेले दोन कुलूप तोडून शटर अर्धवट उचकाटून चोरट्यांनी बँकेत प्रवेश केला. बँकेचे काउंटर व टेबलच्या ड्रायव्हरची उचकापाचक केली. या बँकेत दोन तिजोऱ्या होत्या. महत्वाची कागदपत्रे ठेवलेली तिजोरी चोरट्यांनी फोडले. दुसऱ्या तिजोरीत रोकड ठेवलेली होती. या तिजोराला साय़रम अलार्म असल्याने चोरट्यांनी या तिजोरीला हात लावला. सायरन वाजल्यानंतर आवाजाने ग्रामस्थ जमा होऊन पकडले जाऊ या भितीने चोरटे पसार झाले. ग्रामस्थ आल्यानंतर बँकेचे शटर उघडलेले दिसल्याने त्यांनी बँकेचे शाखाधिकारी रामदास कासार यांना माहिती दिली. शाखाधाकिरी कासार, सोसायटीचे चेअरमन रामदास गुलाब कासार यांनी बँकेत येऊन पाहणी केल्यानंतर चोरट्यांनी चोरी प्रयत्न केल्याचे निदर्शनात आले.