मध्य रेल्वेच्या नेरुळ ते उरण या नवीन मार्गिकेच्या प्रकल्पास वेग देण्याच्या दृष्टीने मध्य रेल्वेतर्फे नेरुळ येथे रविवार, २५ मार्च रोजी आठ तासांचा विशेष ब्लॉक घेतला जाणार आहे. त्यात यार्ड रिमॉडेलिंग आणि नवीन रुट रिले इंटरलॉकिंग (आरआरआय) यंत्रणेसाठी कामे केली जाणार आहेत. रविवारी सकाळी १० ते सायंकाळी ६ वाजेपर्यंत हा ब्लॉक घेतला जाणार आहे. त्यात वाशी ते बेलापूरमधील वाहतूक सेवा खंडीत राहणार आहे. ठाणे ते वाशी ट्रान्सहार्बर सेवा नियमित स्वरुपात चालणार आहे.
रेल्वे मार्गिकेतील सिग्नलसाठी आरआरआय यंत्रणा आवश्यक ठरते. ही यंत्रणा कार्यान्वित करणे ही जटील कामगिरी असून तिच्या पूर्ततेनंतर नेरुळ ते उरण मार्गिका प्रत्यक्षात येण्यास वेग येणार आहे. हा ब्लॉक वाशी ते बेलापरमध्ये दोन्ही आणि तुर्भे आणि नेरुळ डाऊन मार्गांवर घेण्यात येणार आहे.
ब्लॉकमुळे सेवेवर होणारा परिणाम
डाउन हार्बर
वडाळ्याहून सुटणाऱ्या बेलापूर/पनवेल लोकल स. ९.०८ ते सायं. ५.३० या वेळेत आणि बेलापूर/पनवेल ते सीएसएमटी या मार्गावरील सेवा स. ९.४४ ते सायं. ५.५० पर्यंत खंडीत राहणार आहे.
ट्रान्सहार्बर
ठाण्याहून पनवेलसाठी जाणाऱ्या लोकल स. ९.३९ ते सायं. ५.३४ आणि पनवेलहून ठाण्यासाठी जाणाऱ्या लोकल स. ९.४८ ते ५.५७ पर्यंत रद्द करण्यात आल्या आहेत.
विशेष फेऱ्या
सीएसएमटी ते वाशी आणि पनवेल आणि बेलापूरसाठी विशेष फेऱ्या चालवल्या जातील. ठाणे ते वाशी ट्रान्सहार्बर सेवा नियमित स्वरूपात चालणार आहे.