मंगळवारी सोशल मीडियावर चंदीगडच्या एका १६ वर्षांच्या तरुणाची खूप चर्चा होती. हर्षित शर्मा असं या मुलाचं नाव. त्याला गुगल ने वार्षिक १ कोटी ४४ लाख रुपयांच्या गलेलठ्ठ पगाराची ऑफर दिल्याची बातमी वाऱ्यासारखी पसरली होती. पण टाइम्स ऑफ इंडियाने जेव्हा गुगलशी संपर्क साधला तेव्हा अशी कोणतीही ऑफर दिली नसल्याचं गुगलने सांगितलं.
गुगलच्या प्रवक्त्यानं सांगितलं की, ‘आमच्याकडे सध्या तरी हर्षित शर्माला नोकरीची ऑफर दिल्याची कोणतीही माहिती नाही.’ ही बातमी तेव्हा पसरायला सुरुवात झाली, जेव्हा हर्षितची शाळा गव्हर्नमेंट मॉडेल सिनिअर सेकंडरीच्या एका अधिकाऱ्याने हर्षितला गुगलची जॉब ऑफर मिळाल्याची माहिती दिली. शाळेच्या मुख्याध्यापिका इंद्रा बेनीवाल यांनी सांगितले, ‘हा मुलगा आमच्या शाळेतून यंदाच्याच वर्षी उत्तीर्ण होऊन बाहेर पडला आहे. त्यानेच स्वत: शाळेत येऊन ही माहिती दिली. त्याने व्हॉट्स अॅपवर ऑफर लेटरही पाठवलं होतं, पण ते नंतर माझ्याकडून डीलीट झालं. ते पत्र मिळताच मी तुम्हाला देईन.’
मुख्याध्यापकांच्या सांगण्यानुसार, विज्ञान शाखेतून उत्तीर्ण झालेला हर्षित एक सामान्य मुलगा आहे. यापूर्वी डिजीटल इंडिया मोहिमेत हर्षितला ७ हजार रुपयांचं इनामही मिळालं होतं. हर्षितशी संपर्क साधण्याचा प्रयत्न करण्यात आला पण त्याचा फोन बंद होता. सूत्रांच्या माहितीनुसार, गुगल शालेय विद्यार्थ्यांना कधीच नोकरी देत नाही.