पोटाची आग कोणाला काय करायला लावू शकते, याचा नेम नाही. माणसाच्या बाबतीत असे अनेक प्रसंग आपल्याला कधी-ना-कधी ऐकायला मिळतात. पण जनावरांच्या बाबतीत कानपूरमध्ये घडलेला हा किस्सा बहुधा पहिलाच असावा! भुकेनं व्याकूळ झालेल्या एका बकरीनं आपल्या मालकाचे तब्बल ६६ हजार रुपये चावून-चावून खाऊन टाकल्याची घटना इथं घडली आहे. बकरीच्या या ‘खाबुगिरी’नं सर्व आश्चर्यचकीत झाले आहेत.
कानपूरच्या सिलापूर गावात ही घटना घडली. सर्वेश कुमार पाल या शेतकऱ्यानं आपल्या पँटच्या खिशात दोन हजारांच्या ३५ नोटा ठेवल्या होत्या. घरी डागडुजीचं काम सुरू असल्यानं पालने नुकतेच बँकेतून पैसे काढले होते. पण ते काही त्याच्या नशिबात नव्हते. भूक लागल्यामुळं त्याच्या बकरीनं भिंतीला टांगलेली पँट ओढून खिशातील नोटा फस्त केल्या. बकरी नोटा खात असल्याचं समजताच त्यानं तिला हटकलं, पण तोवर तिनं ३३ नोटांचा फडशा पाडला होता. दोन नोटा कशाबशा सर्वेशच्या हाती लागल्या, पण त्याही कुरतडलेल्या स्थितीत होत्या.
‘माझी बकरी मला मुलासारखी आहे. कागदाचे तुकडे दिसले की ते खाऊन टाकायची तिला सवय आहे. पण असं काही होईल, असं मला वाटलं नव्हतं. तिला नोटा खाताना बघून काय करावं हेच मला कळलं नाही’, असं हतबल झालेल्या सर्वेश कुमारनं सांगितलं.
सेल्फी विथ बकरी’ जोरात
बकरीच्या पैसे खाण्याच्या पराक्रमाची वार्ता गावात वाऱ्यासारखी पसरली आणि सर्वेशच्या घरी गावकऱ्यांनी गर्दी केली. काहींनी या ‘पैसे’ खाणाऱ्या बकरीसोबत चक्क सेल्फीही टिपले. बकरीला जनावरांच्या डॉक्टरकडे नेऊन तिला उलटी होण्यासाठीचं औषधं देऊन पैसे परत मिळवण्याचा सल्लाही काहींनी सर्वेश कुमारला दिला. काहींनी घरात आलेल्या लक्ष्मीचा नायनाट करणारी ही बकरी कलंक असून तिला विकून टाकण्यास सांगितलं. बकरीवर यावेळी चोरीचा आरोपही करण्यात आला. बकरीने केलेले कृत्य गुन्हा असून तिला पोलिसांच्या ताब्यात द्यायला हवं असंही एकानं सुचवलं.