महिला प्रवाशासमोर हस्तमैथून करणाऱ्या विकृत रिक्षाचालकाला पोलिसांनी अखेर अटक केली. आरोपी रिक्षाचालकाचे नाव राजबहादूर पाल असून गोराई येथील त्याच्या राहत्या घरातून पोलिसांनी अटक केली. तक्रार दाखल केल्यानंतर अवघ्या १२ तासात पोलिसांनी आरोपीच्या मुसक्या आवळल्या.
बुधवारी रात्री, मालाडहून रिक्षातून घरी जाणाऱ्या एका पत्रकार महिलेसमोर रिक्षाचालकाने अर्ध्या रस्त्यात रिक्षा थांबवत या महिलेसमोर आपली पँट काढून हस्तमैथून केल्याचा धक्कादायक प्रकार घडला होता. ही धक्कादायक घटना महिलेने सोशल मीडियावर पोस्ट केली होती. त्याची दखल घेत पोलिसांनी तक्रार नोंदवून घेतली. पीडित महिलेने दिलेल्या माहितीनुसार पोलिसांनी आरोपीचा शोध घेण्यास सुरूवात केली. सीसीटीव्ही फूटेज आणि पीडित महिलेने दिलेल्या रिक्षाच्या क्रमांकावरून आरोपीचा शोध घेण्याचा प्रयत्न झाला. आरटीओ कार्यालयात रिक्षा क्रमांक पडताळून पाहण्यात आल्यानंतर रिक्षा मालकाचा दहिसर येथील पत्ता सापडला. मात्र, रिक्षा मालकाचा मृत्यू झाल्यानंतर त्यांनी रिक्षा आरोपीला विकली. मूळ रिक्षामालकाच्या मुलाने दिलेल्या माहितीमुळे आरोपीला अटक करण्यात मदत झाली असल्याचे पोलिसांनी सांगितले.