नवीन दुचाकी घेऊन शेगावला गेलेले कुटुंब परतीच्या प्रवासात संग्रामपूर तालुक्यातील पूर्णा नदीच्या खिरोडा पुलाजवळ थांबले. सेल्फी घेत असतानाच मुलगा नदीत कोसळला. त्याला वाचविण्यासाठी वडील आणि नंतर आईनेही उडी घेतली. मात्र सततच्या पावसाने नदीचा जलस्तर अधिक असल्याने तिघेही वाहून गेले. तर अमरावती येथे सिपना इंजिनीअरिंग कॉलेजमागील खदानीत पोहायला गेलेला युवक बुडाला. बुधवारी सायंकाळच्या सुमारास या दोन्ही खळबळजनक घटना घडल्या.
बुलडाणा जिल्ह्यातील जळगाव-जामोद तालुक्यात बुलडाणा अर्बन या पतसंस्थेत कार्यरत राजेश चव्हाण (४२) यांनी नवीन दुचाकी खरेदी केली. म्हणून पत्नी सारिका (३५) व मुलगा श्रावण (११) यांच्यासह शेगावला आले होते. परत जळगाव-जामोदकडे निघाले होते. संग्रामपूर तालुक्यातील पूर्णा नदीच्या खिरोडा येथील पुलावरून जात असताना पावसामुळे फुललेला निसर्ग आणि नदीचा जलस्तर पाहून त्यांना सेल्फी घेण्याचा मोह झाला.
दुचाकी थांबवून त्यांनी नदीजवळ जावून सेल्फी घेण्याचा प्रयत्न केला. सेल्फी घेत असतानाच सुरुवातीला मुलगा पाण्यात पडला. त्यानंतर आई आणि वडील एकमेकांना वाचविण्याच्या प्रयत्नात हे तिघेही या पूर्णा नदीच्या पाण्यात वाहून गेले. हा संपूर्ण प्रकार या पुलावरून जाणाऱ्या गावकऱ्यांच्या लक्षात आला. त्यांनी या तिघांनाही वाचविण्याचा प्रयत्न केला. मात्र त्यांना यश आले नाही. गावकऱ्यांच्या मदतीने पोलिस शोध मोहीम राबवित आहेत. सततच्या पावसामुळे नदीचा जलस्तर वाढल्याने त्यांचा शोध घेण्यात अडचणी येत आहेत. अंधार पडल्यामुळे बचाव कार्यामध्ये अडथळा आल्याने नंतर शोध मोहीम थांबिवण्यात आली.सुटीचा दिवस असल्याने शेगाववरून जळगाव-जामोदकडे परतत असताना खिरोडा पुलावरील पाण्याजवळ सेल्फी घेण्याचा मोह चव्हाण कुटुंबाला नडला. मुलगा पाण्यात पडल्याने त्याला वाचविताना आईवडीलही वाहून गेले. राजेश गुलाबराव चव्हाण (४२), सारिका राजेश चव्हाण (३५) व श्रावण राजेश चव्हाण (११) अशी त्यांची नावे आहेत. राजेश हे बुलडाणा अर्बन पतसंस्थेत कर्मचारी असल्याची माहिती आहे.