जम्मू-काश्मीरमध्ये आज बकरी ईदच्या दिवशी अनेक भागात रस्त्यांवर निदर्शने केली जात आहे. श्रीनगरच्या मुख्य चौकात पाकिस्तान आणि आयएसआयचे झेंडे फडकवत दगडफेक करण्यात आली आणि भारतविरोधी घोषणाही दिल्या गेल्या. दगडफेक करणाऱ्यांना रोखण्यासाठी पोलिसांनी अश्रुधूरही सोडला. कुलगाममध्ये ईदच्या नमाजानंतर घरी परतणाऱ्या पोलीस फय्याज शाह यांची दहशतवाद्यांनी हत्या केली तर पुलवामात एका भाजप कार्यकर्त्याची हत्या करण्यात आली.
कुलगाममध्ये मशीदीबाहेर जिथे एका दहशतवाद्याला ठार करण्यात आलं होतं, तिथेच एक पोलीसही शहीद झाला. पोलीस अधिकाऱ्यांनी दिलेल्या माहितीनुसार, पोलीस फय्याज अहमद शाह ईदचा नमाज अदा करून घरी परतत होते. त्याचवेळी दहशतवाद्यांनी फय्याज यांच्यावर त्यांच्या घराजवळच गोळी झाडली. फय्याज शाह तलवाडा येथे भरतीचं प्रशिक्षण घेत होते. ईदसाठी ते घरी आले होते.
दरम्यान, पुलवामात मध्यरात्री दोन वाजता दहशतवाद्यांनी भाजप कार्यकर्ते शब्बीर अहमद भट यांच्या घरी घुसून त्यांना गोळी घालून ठार केलं. भट यांच्या मृत्यूनंतर भाजप अध्यक्ष अमित शाह यांनी त्यांना श्रद्धांजली वाहिली आहे.