परळ येथील हिंदमाता परिसरात असलेल्या क्रिस्टल टॉवरच या इमारतीच्या १२ व्या मजल्यावर सकाळी साडेआठच्या सुमारास आग लागली. या आगीच्या धुरामुळे श्वास कोंडून चार जणांचा मृत्यू झाला आहे. शॉर्टसर्किटमुळं ही आग लागल्याची प्राथमिक माहिती आहे. चार तासांनी आग नियंत्रणात आली.
आगीनंतर परिसरात धुराचे लोळ उठले. आग लागल्याने भेदरलेले इमारतीतले निवासी घराची गॅलरी, जिन्यावर अडकून पडले होते. क्रेनच्या सहाय्याने अग्निशमन दलाच्या जवानांनी त्यांची सुटका केली. १६ जखमींना केईएम रुग्णालयात दाखल करण्यात आले. यापैकी चौघांचा मृत्यू झाला आहे. मृत्युमुखी पडलेल्यांपैकी एक ज्येष्ठ नागरिक महिला आणि तीन पुरुष आहेत. आग लागताच अग्निशमन दलाच्या १० ते १२ गाड्या घटनास्थळी तातडीने दाखल झाल्या होत्या. तीन रुग्णवाहिकाही तिथं पोहोचल्या होत्या. ही निवासी इमारत असून क्रेनच्या मदतीनं त्यातील रहिवाशांना बाहेर काढले गेले.