दारूचा पेग बनविण्यावरून झालेल्या वादातून एका तरुणानं त्याच्या मित्रावर ब्लेडनं हल्ला करून त्याचं गुप्तांग कापल्याची धक्कादायक घटना चेन्नईत घडली आहे. पोलिसांनी हल्लेखोर तरुणाला अटक केली असून त्याच्यावर खुनाच्या प्रयत्नांचा गुन्हा दाखल केला आहे.
मूर्ती व सर्वनन हे दोघे तरुण तिरुवन्नामलाई इथं रोजंदारीवर काम करतात. रविवारी रात्री कोलाथूर येथील राजमंगलम परिसरातील एका दारूच्या दुकानाजवळ ते दारू पित होते. पेग बनविताना कमी दारू दिल्याचा राग मनात धरून सर्वनन यानं मूर्तीवर दगडानं हल्ला केला. दगड डोक्याला लागल्यानं मूर्ती रक्तबंबाळ झाला. त्यानं सर्वननला शिवीगाळ सुरू केली. त्यामुळं आणखी संतापलेल्या सर्वनननं खिशातील ब्लेड काढून मूर्तीचं गुप्तांग कापून टाकलं. या हल्ल्यात गंभीर जखमी झालेला मूर्ती जोरजोरात ओरडू लागला. हा आवाज ऐकून तिथं धावलेल्या लोकांनी त्याला तातडीनं रुग्णालयात दाखल केलं. त्याच्यावर सध्या उपचार सुरू आहेत.
हा सगळा प्रकार पाहून संतापलेल्या स्थानिकांनी हल्लेखोर सर्वननला पकडून बेदम मारहाण केली आणि पोलिसांच्या ताब्यात दिलं. पोलिसांनी सर्वननवर खुनाच्या प्रयत्नाचा गुन्हा दाखल केला आहे. सर्वनननं हल्ल्याची कबुली दिली आहे. मूर्तीनं पेग बनवताना मला खूप कमी दारू दिल्याच्या रागातून मी हे कृत्य केल्याचं त्यानं म्हटलं आहे.