बलात्कारीला एका दिवसातही शिक्षा दिली जाऊ शकते, हे मध्य प्रदेशातल्या एका कोर्टाने दाखवून दिले आहे. बलात्कार प्रकरणात न्यायालयात आरोपपत्र दाखल होताच २४ तासांच्या आत न्यायालयाने दोषीला शिक्षा सुनावली.
हा बलात्कारी अल्पवयीन आहे. जुवेनाईल कोर्टाने त्याला दोन वर्षांची शिक्षा दिली. हे प्रकरण बलात्कारासंदर्भातले सर्वात जलदगतीने चाललेले प्रकरण मानण्यात येत आहे आणि ही शिक्षा सर्वात जलदगतीने दिलेली शिक्षा आहे. याबाबात घाटिया पोलीस स्टेशनचे प्रभारी एन.एस. कनेश यांनी टाइम्स ऑफ इंडियाला सांगितले, ‘पीडितेला तिचे नातेवाईक स्वातंत्र्यदिनादिवशी आपल्या शेजारच्या १४ वर्षीय मुलाकडे खेळण्यासाठी सोडून गेले, त्यावेळी त्याने तिच्यावर बलात्कार केला.’
बलात्कारानंतर हा आरोपी मुलगा फरार झाला. १६ ऑगस्टच्या रात्री त्याला चौमहला भागातल्या नातेवाईकांच्या घरून अटक करण्यात आली. चार दिवसांतच त्याची चौकशी करून सोमवारी आरोपपत्र दाखल करण्यात आले. न्यायाधीश तृप्ती पांडे यांनी काही तासांतच निर्णय दिला. दोषी अल्पवयीन मुलाला सिवनी बालसुधारगृहात दोन वर्षे ठेवण्यात येणार आहे.