आई टीव्ही बघू देत नाही म्हणून पुण्यातील १७ वर्षांच्या मुलीने घर सोडून थेट मुंबई गाठल्याचा प्रकार उघडकीस आला आहे. स्वातंत्र्यदिनी गेट वे ऑफ इंडियाजवळ गस्त घालणाऱ्या कुलाबा पोलिस ठाण्याच्या महिला कॉन्स्टेबल जिजाबाई पवार यांच्या सतर्क नजरेने या मुलीला हेरले. आधी उडवाउडवीची उत्तरे देणाऱ्या या मुलीने नंतर घरात पळून आल्याची कबुली दिली आणि कुलाबा पोलिसांनी तिला सुखरूप कुटुंबीयांच्या स्वाधीन केले.
स्वातंत्र्यदिनी बराच उशीर झाला तरी एक अल्पवयीन मुलगी एकटीच फिरत असल्याचे महिला कॉन्स्टेबल जिजाबाई पवार यांच्या लक्षात आले. ही मुलगी मुंबईत नवीन असल्यासारखी वावरत होती. पवार यांनी तिला हटकून चौकशी सुरू केली असता, सुरुवातीला तिने आपण पुण्याची असल्याचे आणि खूप वर्षांपूर्वी आई-वडिलांचे निधन झाले असल्याचे तिने सांगितले. मात्र, पवार यांचे तिच्या उत्तराने समाधान झाले नाही. त्यांनी मुलीची सखोल चौकशी केली असता, ‘टीव्ही लावला की आई ओरडते. रोजच्या ओरडण्याचा कंटाळा आला म्हणून घरातून पळाले’, असे मुलीने त्यांना सांगितले.
जिजाबाई पवार यांनी मुलीला कुलाबा पोलिस ठाण्यात नेल्यानंतर पोलिसांनी मुलीकडून फोन क्रमांक घेऊन तिच्या आईवडिलांशी संपर्क केला. तिचे पालक पुण्याहून मुंबईत आले आणि योग्य त्या पुराव्यानंतर पोलिसांनी तिला कुटुंबीयांच्या स्वाधीन केले.