त्यांचे लग्न टिकले अवघे चार महिनेच… एकमेकांबरोबर पटत नसल्यामुळे ते वेगळे झाले… तो अमेरिकेत गेला; तर ती जर्मनीमध्ये… दोघांनी पुणे फॅमिली कोर्टात परस्पर संमतीने घटस्फोटाचा दावा दाखल केला…व्हिडिओ कॉन्फरसिंगद्वारे साक्ष नोंदवून भारतात न येताच त्यांचा वेगळा होण्याचा मार्ग मोकळा झाला… फॅमिली कोर्टाने त्यांचा घटस्फोट मंजूर केला.
फॅमिली कोर्टाचे न्या. सुभाष काफरे यांच्या कोर्टाने हा निकाल दिला. अॅड. झाकीर मणियार यांची याप्रकरणात कोर्ट कमिशनर म्हणून नियुक्ती करण्यात आली होती. या दाव्यात अॅड. प्रगती पाटील यांनी मीडिएटर म्हणून काम पाहिले. अर्जदारांतर्फे अॅड. गणेश कवडे यांनी कामकाज पाहिले. समीर आणि नयना ( दोघांची नावे बदलली आहेत)
या दोघांचे पुण्यात जुलै २०१६ मध्ये लग्न झाले. लग्नानंतर त्यांचे एकमेकांशी न पटल्यामुळे ते चार महिन्यांतच वेगळे झाले. परदेशात नोकरीनिमित्त गेलेल्या त्या दोघांनी पुणे फॅमिली कोर्टात पॉवर ऑफ अॅटर्नी नातेवाइकांना देऊन घटस्फोटाचा दावा दाखल केला. त्या दोघांना भारतात कोर्टात येऊन सुनावणीला हजर राहणे शक्य नव्हते. मात्र, फॅमिली कोर्टातील व्हिडिओ कॉन्फरसिंगद्वारे परदेशातील पक्षकारांबरोबरही संवाद साधण्याच्या तंत्रज्ञानामुळे त्यांची साक्ष नोंदविण्यात आली. यासाठी फॅमिली कोर्टाकडून अॅड. झाकीर मणियार यांची कोर्ट कमिशनर म्हणून नियुक्ती करण्यात आली. त्यांनी या दोघांची साक्ष नोंदवून त्याचा अहवाल कोर्टाला सादर केला. त्यानुसार कोर्टाने परस्परसंमतीचा घटस्फोटाचा दावा मंजूर केला. कोर्टाने तिला तीन लाख रुपयांची नुकसानभरपाई त्याने दिली.
पुणे फॅमिली कोर्टात आता परदेशात राहणाऱ्या व्यक्तींशी व्हिडिओ कॉन्फरसिंगद्वारे थेट संपर्क करून त्यांची साक्ष, जबानी नोंदविण्याची सुविधा उपलब्ध करण्यात आली आहे. पूर्वी अशा व्यक्तींना स्वत: कोर्टात हजर राहावे लागत असे. परदेशात राहणाऱ्या व्यक्तींना तेथील राजदूतासमोर प्रतिज्ञापत्रे भारतीय कोर्टात सादर करावी लागत असे. त्यामध्ये वेळेचा अपव्यय होत असे. मात्र, कोर्टातूनच थेट संबंधितांशी संपर्क साधला जाऊ शकतो. त्याची ओळख आणि कागदपत्रांची शहानिशा करून थेट संवाद साधला जातो. फॅमिली कोर्टाच्या नवीन इमारतीतील कामकाजाला नुकतेच एक वर्ष पूर्ण झाले. व्हिडिओ कॉन्फरसिंगची सुविधा परदेशातील पक्षकारांसाठी फायदेशीर ठरणारी आहे.