सिडकोने आर्थिकदृष्ट्या दुर्बल व कमी उत्पन्न गटातील नागरिकांसाठी सुमारे १५ हजार घरांची महागृहनिर्माण योजना आखली असून, त्यासाठीची ऑनलाइन नोंदणी आज, सोमवारपासून सुरू होणार आहे.
मुख्यमंत्री देवेंद्र फडणवीस यांच्या हस्ते या योजनेचा शुभारंभ होणार असल्याची माहिती सिडकोचे व्यवस्थापकीय संचालक लोकेश चंद्र यांनी रविवारी दिली. सर्वांसाठी घरे व पंतप्रधान आवास योजनेअंतर्गत सिडको ही योजना राबविणार असून, १४,८३८ घरांसाठी ही नोंदणी असेल. घरांसाठी ऑनलाइन अर्ज स्वीकारण्याची प्रक्रिया स्वातंत्र्यदिनापासून सुरू होणार असल्याचे ते म्हणाले. सिडकोच्या या बहुप्रतीक्षित योजनेअंतर्गत नवी मुंबईतील तळोजा, खारघर, कळंबोली, घणसोली, द्रोणागिरी या पाच विभागांत ११ ठिकाणी ही घरे उभी राहणार आहेत. यातील ५२६२ घरे आर्थिकदृष्ट्या दुर्बल घटकांसाठी आणि ९५६७ घरे अल्पउत्पन्न गटातील नागरिकांसाठी आहेत.
प्रथमच सिडकोने ऑनलाइन नोंदणी पद्धतीचा अवलंब करण्यात आला आहे. याविषयीची माहिती https://lottery.cidcoindia.com या सिडकोच्या वेबसाइटवर उपलब्ध आहे. यावर १३ ऑगस्ट ते १५ सफ्टेंबरपर्यंत अर्ज नोंदणी आणि १५ ऑगस्ट ते १७ सप्टेंबर या कालावधीत नोंदणी होईल. घरांची लॉटरी २ ऑक्टोबर रोजी काढण्यात येईल.